Փաստ ինֆո

Շատ վատ է, որ հասարակության մեջ դեռևս մի մաս ունենք, որը կարծում է, որ Հայաստանում հնարավոր է անօրինական եղանակով գումար վաստակել և երեկվա դեպքն այդ մտայունությունն ունեցող մարդկանց այդ մտքից հրաժարվելու համար բավականին կոշտ արձագանք էր մեր կողմից: ‹‹Փաստինֆո››-ի հետ զրույցում ասաց Տավուշի մարզպետ Հայկ Չոբանյանը:

Նշենք, որ Իջեւանում «փայտի գործով» զբաղվող մի շարք անձինք` մոտ 600 հոգի, երեկ փակել էին միջպետական ճանապարհը` պահանջելով անտառահատման արգելքի վերացում, արդեն հատված անտառանյութն անտառից դուրս բերելու իրավունք եւ հանդիպում այն պաշտոնյայի հետ, որը արգելել է անտառից փայտ դուրս բերել։ Տեղի էին ունեցել բախումներ քաղաքացիների և ոստիկանների միջև, որոնց արդյունքում 19 մարդ ստացել է տարբեր աստիճանի մարմնական վնասվածքներ։ Տուժողների մեծ մասը ոստիկաններ են։

Տավուշի մարզպետը նշեց, որ իրենք ամեն բան արել են, որպեսզի ակցիան ավելի վատ ընթացք չունենա: Չոբանյանը չբացառեց՝ հնարավոր է ակցիան ուղղորդված լինի, սակայն ասաց, որ դրան իրավապահ մարմինները պետք է գնահատական տան:

‹‹Որևէ անօրինականություն մենք մեր երկրում թույլ չենք տալու և ամեն հնարավոր ու անհնար միջոց օգտագործելու ենք, որպեսզի երկրի պետականությունը պաշտպանենք, որովհետև անօրինական պահանջը առաջին հերթին վտանգ է մեր երկրի պետականության դեմ և մենք իրավունք չունենք նույնիսկ 1 միլիմետր ընկրկել»,-ասաց Տավուշի մարզպետը:

Նրա խոսքով, երեկվա ակցիային իրենց արձագանքը ոչ միայն բուն ակցիային համապատասխան արձագանք տալն էր ու խնդիրը լուծելը, այլև ուղերձ էր նրանց համար, ովքեր երբևէ կորոշեն անօրինական պահանջների և գործողությունների համար ակցիա անել:

‹‹Բոլորը կիմանան, որ մեր դիրքորոշումը հստակ, անդրդվելի և միանշանակ է լինելու, առ այն, որ ցանկացած նմանատիպ պահանջ մենք դիտարկում ենք որպես վտանգ մեր պետականության հանդեպ»,-ընդգծեց Չոբանյանը:

Նրա խոսքով, քաղաքացիները հնարավորինս երկար են ակցիան շարունակել, մինչև համոզվելը, որ հակառակ կողմը լուրջ է տրամադրված:

‹‹Ըստ էության սկզբում նրանք կասկածի տակ էին դնում մեր այն կոչերը, հաստատումները, որ որևէ անօրինականություն թույլ չենք տալու, մտածում էին՝ հնարավոր է որևէ զիջման գնանք, սակայն երբ համոզվեցին, որ դա չի լինելու՝ ընկրկեցին»,-ասաց Տավուշի մարզպետը:

Հեղինակ` Սոնա Գեւորգյան