Փաստ ինֆո

«Դա աբսուրդի ժանրից է, հիմարության: Մարդկանց մեջ մտել է, որ եթե մի քանի հոգով վեր կենան բունտ անեն, իրենց ցանկացած պահանջ կլուծվի»,-«Փաստինֆո»-ի հետ զրույցում հոգեբան Սամվել Խուդոյանը այսպես մեկնաբանեց Իջևանի բնակիչների ցույցը: Իջևանցիները երեկ փակել էին Երևան-Իջևան ճանապարհն ու պահանջում էին, որ հանեն հսկիչ պահակակետերը, որոնք վերահսկում են Իջևանից, Տավուշից ապօրինի ծառահատման դեպքերը.

«Երևի օրինակ վերցնելով տարբեր այդ կարգի երևույթներից, որ ինչ-որ մեկը իր անհեթեթ, անիմաստ պահանջներով ինչ-որ բանում հասել է իր նպատակին, նույնիսկ կարող է ինչ-որ տեղ մտածելով, որ իրենց այս ակցիան և ընդհանրապես Նիկոլ Փաշինյանի իշխանության գալու այդ պրոցեսը նման են՝ բունտերով, ճանապարհ փակելով հարց է լուծվել, ուրեմն իրենք էլ կարող են այդպես անել: Դա աղավաղված տրամաբանության, աղավաղված ընդհանրացումների, աղավաղված եզրակացության, հիվանդագին երևակայության արդյունք է»:

Անդրադառնալով բախումներին՝ Սամվել Խուդոյանը նշեց, որ տեղի ունեցածն անընդունելի է, անխտիր բոլորը պետք է պատասխանատվության ենթարկվեն.

« Ցուցարարներն ագրեսիվ են եղել, բոլորին պետք է պատասխանատվության ենթարկել առանց մի րոպե մտածելու, պետք է շատ խիստ վերաբերվել նման բաներին: Քանի որ վարչապետը Իջևանից է, խիստ հայտարարություններ պետք է անի, որ դուք փաստորեն օգտվել եք այն առիթից, որ ես Իջևանից եմ ու խայտառակել եք և՛ Իջևանը, և՛ իջևանցիներին և՛ անձամբ ինձ: Ես այդպես կանեի, կառաջարկեի այդպես անել»:

Հեղինակ` Անահիտ Հովհաննիսյան