Փաստ ինֆո

Փաստաբան Նորայր Նորիկյանը նախօրեին ՀՀ վարչապետ Նիկոլ Փաշինյանի հնչեցրած հայտարարություններից եզրակացրել է, որ գործադիր իշխանությունում գոնե այս պահին գոյություն չունի դատաիրավական համակարգի վերափոխման որևէ կոնկրետ հայեցակարգ կամ հստակություն, ինչպես նաև այս հարցերը լուծելու կոնկրետ բանաձև:

Նրա ֆեյսբուքյան գրառման մեջ ասվում է.

«Եթե ՍԴ և ԲԴԽ նախկին նախագահ Գագիկ Հարությունյանին հաջողվել է Վենետիկի հանաժողովի միջոցով վիժեցնել Հայաստանի իշխանությունների ջանքերը՝ սահմանադրական դատարանի շուրջ ստեղծված իրավիճակի հանգուցալուծման, ինչպես նաև Հայաստանում վեթինգի հնարավոր իրականացման հարցում, ուրեմն այդ մարդուն հետ բերեք և «գնահատեք» նրա հնարավորությունները:

Իսկ եթե լուրջ, եթե Դուք իսկապես համոզված եք, որ Դուք ճիշտ եք, որ ճիշտը Դուք եք, որ Հայաստանում խաթարված է դատաիրավական համակարգի բնականոն գործունեությունը, որ գոյություն չունի արդարադատություն, որ անհրաժեշտ է իրականացնել վեթինգ, որ պետք է լուծել սահմանադրական դատարանի խնդիրը, և ամենակարևորը՝ Ձեր բոլոր քայլերը եթե օրինական են, Դուք վախենալու ի՞նչ ունեք, տղե՛րք: Ինչու՞ եք հապաղում:
Դու՞ք եք բարձրացրել սահմանադրական դատարանի հարցը, գտնում եք, որ այնտեղ ճգնաժամ կա՞, ուրեմն Դուք էլ լուծեք այս հարցը: Մեր ժողովուրդը Ձե՛զ է մանդատ տվել՝ աշխատելու և պետության խնդիրները լուծելու համար: Ի՞նչ Վենետիկի հանձնաժողով:
Դուք չգիտե՞ք, որ Վենետիկի հանձնաժողովի հիմնական առաքելությունը ԿԱՐԾԻՔ հայտնելն է, որ այդ կարծիքը որոշիչ ու իմպերատիվ չէ:
Համաձայն չե՞ք այդ կարծիքի հետ, գտնում եք, որ այն թելադրված է Գագիկ Հարությունյանի կողմի՞ց, ապօրինի է ու հակասում է ՆՈՐ ՀԱՅԱՍՏԱՆԻ զարգացման տեսլականին ու արժեհամակարգին, վճռականորեն կանգնե՛ք ու ասեք, որ Դուք խորապես հարգում եք Վենետիկի հանձնաժողովին, սակայն համաձայն չեք այդ կարծիքի հետ և կատարեք Ձեր քայլը…

Գոնե ինձ համար պարզ է, որ այս պահին այս հարցի լուծումը Դուք չունեք: Ունենայիք, հիմա Վահեն շատ վաղուց ստացել էր իր նամակի պատասխանը:
Ն. Փաշինյանի «Ազատություն» ռադիոկայանին տված հարցազրույցից էլ հասկացա, որ գործադիր իշխանությունում գոնե այս պահին գոյություն չունի դատաիրավական համակարգի վերափոխման որևէ կոնկրետ հայեցակարգ կամ հստակություն, ինչպես նաև այս հարցերը լուծելու կոնկրետ բանաձև:
Դուք ասում եք, որ սահմանադրական դատարանը բուտկի պես սեփականաշնորհել են:

Ճի՛շտ եք ասում: Ուղղակի զարմանալին այն է, որ այդ «Սեփականաշնորհման» պատվիրատուները, ճարտարապետները, հեղինակները հանգիստ վայելում են իրենց թոշակները, և Դուք գոնե առերևույթ չեք էլ մտածում նրանց արարքներին իրավական գնահատական տալու մասին, բայց ցանկանում եք վռնդել այդ սեփականաշնորհումից օգտված բուտկի նախագահին: Դուք չեք զարմանու՞մ…»

Աղբյուր` Փաստինֆո