Փաստ ինֆո

Առանձին գործերով խորհրդատվական կարծիք ստանալու նպատակով Մարդու իրավունքների եվրոպական դատարան  ՀՀ Սահմանադրական դատարանը դիմում է առաջին անգամ։ Ինչպես «Փաստինֆո»-ին տեղեկացրեց իրավաբան Գոհար Մելոյանը, նման իրավունք ՀՀ ՍԴ-ն նախկինում չի ունեցել, այն ձեռք է բերել մոտ մեկ տարի առաջ։

«Առանձին գործերով խորհրդատվական կարծիք ստանալու նպատակով Մարդու իրավունքների եվրոպական դատարան դիմելու հնարավորությունը ՀՀ սահմանադրական դատարանը ձեռք է բերել 2018 թվականի օգոստոսի 1-ին ուժի մեջ մտած «Մարդու իրավունքների և հիմնարար ազատությունների» կոնվենցիայի 16-րդ արձանագրության հիման վրա, որը ՀՀ Ազգային ժողովը վավերացրել է 2016 թվականի հոկտեմբերին։ Արձանագրության հիման վրա անդամ պետությունների բարձրագույն դատարանները կարող են դիմել Մարդու իրավունքների եվրոպական դատարան՝ իրենց վարույթում գտնվող կոնկրետ գործով խորհրդատվական կարծիք ստանալու նպատակով։ Մեր դեպքում՝ Հայաստանի Հանրապետության բարձրագույն դատարաններ են համարվել՝ Սահմանադրական և Վճռաբեկ դատարանները։ Ըստ նշված 16-րդ արձանագրության, նախ՝ քննարկվելու է դիմումը վարույթ ընդունելու հարցը, ապա, դրական որոշման պարագայում, դիմումն ընդունվելու է՝ խորհրդատվական եզրակացություն տրամադրելու նպատակով»,- ասաց Գ.Մելոյանը։ 

Ինչպես արդեն «Փաստինֆո»-ն տեղեկացրել է՝ Սահմանադրական դատարանն ընդունել է աշխատակարգային որոշումներ՝ «Երևան քաղաքի ընդհանուր իրավասության դատարանի և Ռոբերտ Քոչարյանի դիմումների հիման վրա՝ Հայաստանի Հանրապետության քրեական օրենսգրքի 300.1-րդ հոդվածի՝ Սահմանադրությանը համապատասխանության հարցը որոշելու վերաբերյալ» գործերով խորհրդատվական կարծիք ստանալու նպատակով՝ Մարդու իրավունքների եվրոպական դատարանին և Վենետիկյան հանձնաժողովին դիմելու, և այդ կապակցությամբ վերոնշյալ գործերի վարույթները, մինչև պատասխանները ստանալը, կասեցնելու վերաբերյալ:

Գործերի կասեցումն իրականացվել է «Սահմանադրական դատարանի մասին» սահմանադրական օրենքի 56-րդ հոդվածի առաջին մասի 5-րդ կետի հիման վրա, համաձայն որի՝ Սահմանադրական դատարանը կարող է կասեցնել գործի վարույթը` Սահմանադրական դատարանի պատճառաբանված աշխատակարգային որոշմամբ նախատեսված դեպքերում:

Գոհար Մելոյանը նշեց, որ համաձայն «Սահմանադրական դատարանի մասին» սահմանադրական օրենքի Սահմանադրական դատարանի կողմից համապատասխան գործերի քննությունը կվերսկսվի նշված երկու կառույցներից համապատասխան պատասխաններ ստանալուց կայացումից հետո։ Մինչ այդ սահմանադրական օրենքով սահմանված դատավարական ժամկետները կասեցվելու են:

Աղբյուր` Փաստինֆո