Փաստ ինֆո

Երեկ Իջևանում ոստիկանների և քաղաքացիների միջև տեղի ունեցած բախումների դեպքի առթիվ քրեական գործը հարուցվել է խուլիգանության եւ իշխանության ներկայացուցչի նկատմամբ բռնություն գործադրելու հատկանիշներով։ Այս մասին «Փաստինֆո»-ին տեղեկացրեց Քննչական կոմիտեի տեղեկատվության եւ հասարակայնության հետ կապերի բաժնի պետի պաշտոնակատար Նաիրա Հարությունյանը։

Վերջինիս փոխանցմամբ՝ քրեական գործը հարուցվել է Քրեական օրենագրքի 258-րդ հոդվածի 3-րդ մասի 1-ին կետով, այն է՝ մի խումբ անձանց կամ կազմակերպված խմբի կողմից խուլիգանությունը, 258-րդ հոդվածի 4-րդ մասով, այն է՝ որպես զենք օգտագործվող առարկաների գործադրմամբ խուլիգանությունը, ինչպես նաև 316-րդ հոդվածի 2-րդ մասով, այն է՝  իշխանության ներկայացուցչի նկատմամբ բռնություն գործադրելը՝ կապված նրա ծառայողական պարտականությունները կատարելու հետ։

Նշենք, որ այս պահին կան բերման ենթարկված անձինք:

Քրեական գործը քննում է Քննչական կոմիտեի հատկապես կարևոր գործերի քննության գլխավոր վարչության մարդու դեմ ուղղված հանցագործությությունների քննության վարչությունում: ՀԿԳ քննության գլխավոր վարչության պետի հանձնարարությամբ կազմվել է քննչական խումբ, մշակվել է քննչական պլան:

Քննիչները և ոստիկանները ձեռնարկում են անհրաժեշտ քննչական, դատավարական, օպերատիվ-հետախուզական անհետաձգելի գործողություններ, դեպքի բոլոր հանգամանքները պարզելու և նրանցից յուրաքանչյուրի գործողություններին քրեաիրավական գնահատական տալու վերաբերյալ։

Ավելի վաղ «Փաստինֆո»-ն հայտնել է, որ Իջեւանում «փայտի գործով» զբաղվող մի շարք անձինք` մոտ 600 հոգի, փակել էին միջպետական ճանապարհը` պահանջելով անտառահատման արգելքի վերացում, արդեն հատված անտառանյութն անտառից դուրս բերելու իրավունք եւ հանդիպում այն պաշտոնյայի հետ, որը արգելել է անտառից փայտ դուրս բերել։ 

Իջեւանի բժշկական կենտրոնից հայտնել են, որ բախումների հետեւանքով հիվանդանոց է տեղափոխվել 14 անձ, որոնցից 12-ը` ոստիկաններ:

Նշենք, որ երեկ Երեւանից Իջեւան է տեղափոխվել նաեւ հատուկ ջոկատայինների խումբը, ապա անձամբ այնտեղ է մեկնել ՀՀ ոստիկանապետ Վալերի Օսիպյանը։ Տեղում բանակցությունների արդյունքում գիշերը հաղորդվեց ճանապարհի բացվելու մասին: Տավուշի մազպետը հայտարարեց, որ ցուցարարների անօրինական որեւէ պահանջ չի կատարվել:

Հեղինակ` Միլենա Խաչիկյան