Փաստ ինֆո

«Վահե Գրիգորյանի նամակն ինձ ուղղակի ցնցեց, որովհետև այն կարդալով ես հասկացա, որ 2018թ.-ին՝ տրանսֆորմացիայի շրջանում, բոլորս կենտրոնացած լինելով Սերժ Սարգսյանի շուրջ ստեղծվող քաղաքական մանիպուլյացիայի վրա և դրանով զբաղված լինելով, միգուցե մասնագիտական նրբությունների չիմացության պատճառով, չենք նկատել, որ նույնամասշտաբ մանիպուլյացիան տեղի է ունեցել ՍԴ-ում››,-այսօր Ազատություն TV-ի հետ հարցազրույցում ասել է  ՀՀ վարչապետ Նիկոլ Փաշինյանը:

Նա նշեց, հայտնի հանգամանքների բերումով ՍԴ-ն ՀՀ-ում ամենավարկաբեկված ինստիտուտներից մեկն է, որովհետև ի վերջո այն վավերացրել է 1996թ-ից սկսած բոլոր ընտրակեղծիքները և, ըստ էության, կա վստահության ճգնաժամ նաև ՍԴ-ի նկատմամբ:

Վարչապետի խոսքով, Հայաստանն այսօր չունի այն Սահմանադրական դատարանը, որը նկարագրված է Սահմանադրության մեջ, քանի որ նոր Սահմանադրությունը ուժի մեջ մտնելուց 40 օր առաջ ՍԴ-ի նախկին նախագահ Գագիկ Հարությունյանը հրաժարական տվեց ներիշխանական գործարքի և մանիպուլյացիայի արդյունքում:

‹‹Տեղի ունեցավ մեծ առևտուր, որտեղ մի քանի առանցքային դեմքեր ստանում էին իրենց հասանելիքը, Սերժ Սարգսյանը վարչապետի պաշտոնը, Գագիկ Հարությունյանը ԲԴԽ նախագահի պաշտոնը: Նոր Սահմանադրության ուժի մեջ մտնելուց 40 օր առաջ Գագիկ Հարությունյանը հրաժարական տվեց և նրա փոխարեն առաջադրվեց, ԱԺ-ի կողմից ընտրվեց ՍԴ անդամ և նախագահ Հրայր Թովմասյանը: Մինչդեռ նոր Սահմանադրությամբ նախատեսված է, որ ՍԴ նախագահ ընտրում է հենց ինքը ՍԴ-ն››,-ասաց Փաշինյանը:

Նա ընդգծեց՝քանի որ նախկին իշխանությունների ձեռքում էր թուղթն ու գրիչը, անցումային դրույթ գրվեց, որ ովքեր ապրիլի 9-ից առաջ են ընտրվել ՍԴ անդամ, նրանց վրա տարածվում են 2005թ-ի կարգավորումները:

‹‹Այսինքն նրանք ոչ թե 12 տարով են ընտրվում, այլ, ըստ էության, ցմահ կամ մինչև 65 տարի: Նույնը վերաբերվում է նաև ՍԴ նախագահին: Ստացվում է, որ մենք մեր Սահմանադրության մեջ ՍԴ ունենք նկարագրված, բայց այդպիսի դատարան մենք չենք կարող ունենալ մինչև առնվազն 2035 թ-ը, քանի որ Հրայր Թովմասյանը եղել է Սահմանադրության տեքստի հեղինակը, ինքը Սերժ Սարգսյանի և Գագիկ Հարությունյանի հետ համաձայնեցված այնպես է գրել տեքստը, որ մինչև 2035թ-ը մնա ՍԴ նախագահ, չնայած մեր Սահմանադրությունն արդեն նախատեսել է, որ այդպիսին չէ մեր ուզած ՍԴ-ն: Սահմանադրի կամքն այլ է››,-նշեց վարչապետը:

Ըստ նրա՝ տեղի է ունեցել ՍԴ-ի սեփականաշնորհում և այսօր ՍԴ-ն զրկված է ինքն իր համար նախագահ ընտրելու իրավունքից մինչև 2035թ.-ը, չնայած Սահմանադրության մեջ գրված է, որ ՍԴ նախագահն ընտրվում է դատարանի կազմից››,-ասաց վարչապետն ու ավելացրեց, որ ՍԴ մյուս ներկայացուցիչները զրկված են ՍԴ նախագահի կարգավիճակին 6 տարի հետո հավակնելու իրենց Սահմանադրական իրավունքից:

Աղբյուր` Փաստինֆո