Փաստ ինֆո

ՀՀ ոստիկանապետ Վալերիյ Օսիպյանը երեկվանից Իջևանում է: Լրագրողների հարցին ի պատասխան, թե ինչպե՞ս կմեկնաբանի երեկվա բախումներն ու ոստիկանական ուժերի կենտրոնացումը Իջևանում, ոստիկանապետը պատասխանեց, որ բախումները միակողմանի են եղել, քաղաքացիներն էլ իրենց անօրինական պահանջով են ճանապարհ փակել.

«Բախումներ եղել են, բայց միակողմանի, միայն քաղաքացիներն են հարվածներ հասցրել: Երեկ տեղի ունեցավ հետևյալը, մի խումբ քաղաքացիներ օրվա ցերեկային ժամերին 5-6 անգամ տարբեր հատվածներում փակեցին ճանապարհներ, ոստիկանության ծառայողների բացատրական աշխատանքներից հետո ճանապարհը բացվում էր: Երեկոյան քաղաքացիները շատացել են , թիվը հասել է 500-600-ի, հրաժարվել են կատարել ոստիկանների օրինական պահանջները, բացել Երևան-Իջևան-Նոյեմբերյան ճանապարհը:

Իմ կողմից որոշում կայացվեց, հանձնարարվեց ոստիկաններին՝ օրենքի սահմաններում շղթա կազմեն, հայտարարելուց հետո, պահելով օրենքի տառը, քայլեն առաջ, քաղաքացիներին բացատրեն և ստիպեն ազատել ճանապարհի այդ հատվածը: Մեր ծառայողների օրինական պահանջները նրանք դիմավորեցին մահակներով, մետաղյա ձողերով, քարերով, որի արդյունքում Ոստիկանության թվով 12 ծառայողներ մարմնական տարբեր աստիճանի վնասվածքներ ստացան և տեղափոխվեցին Իջևանի բուժական հաստատություն: Իմ կողմից որոշում կայացվեց լրացուցիչ ուժեր ուղարկել Իջևան, ինքս էլ շտապեցի գտնվել այստեղ:

Իրավիճակի մասին զեկուցեցի վարչապետին և մեկնեցի Իջևան: Ինձ դիմավորեցին մոտ 30 քաղաքացի, ես նրանց հետ բանակցում էի , որը տևեց մոտ կես ժամ, այդ ընթացքում ես բացատրեցի նրանց կողմից անօրինական գործողությունները: Նրանք պահանջում էին, որ վերացնենք Տավուշի մարզում տեղակայված անշարժ պահակակետերը, որոնք վերահսկում են Իջևանից, Տավուշից ապօրինի ծառահատման դեպքերը, նաև այդ ապօրինի ծառահատման դեպքերից հետո քաղաքացիները փորձում են այն տեղափոխել Երևան, այլ մարզեր վաճառելու: Պայմանով էին խոսում ինձ հետ, ասում էին՝ հրաման տվեք, հանեք հսկիչ պահակակետերը, Ոստիկանության բաժիններում փայտով բեռնված մեքենաներ կան՝ մի մասն առանց փաստաթղթերի մեքենաներ, պայման էին դրել, որ վարորդներին թողենք, մեքենաները թողենք, չկազմենք արձանագրություն: Ես ասացի, որ ոչ միայն բաց չեն թողնելու, այլև այս դեպքերով էլ են քրեական գործեր հարուցվելու»,- ասել է ոստիկանապետը :

Ոստիկանապետն անթույլատրելի է համարել նման լեզվով խոսելը: «Տարիներ շարունակ իրենք սովոր են եղել, որ ոչնչացրել են անտառը, զբաղվել են այդ անտառի առ ու վաճառքով, և քանի որ մենք խոսում ենք օրինականությունից և Հեղափոխությունից հետո բոլորի պահանջն էր, որ բոլոր գործողությունները պետք է լինեն օրենքի տառին համապատասխան: Ցանկացած գործողություն լինելու է օրենքի տառին համապատասխան: Մենք թույլ չենք տալու, որ նման տոնով խոսեն Ոստիկանության հետ, նման տոնով խոսեն իշխանության ներկայացուցչի հետ և թույլ չեն տալու, որ իրենք թելադրեն ապագան»,- նշել է Վ.Օսիպյանը:

Լրագրողները նաև հետաքրքվեցին՝ ոստիկանապետը հաճախ է ասում, որ ոստիկանները հանդուրժող են լինելու, արդյոք դա թուլության նշան չի կարող ընկալվել.

«Հանդուրժող լինելը չի նշանակում , որ ոստիկանը թույլ է: Կան քաղաքացիներ, որոնք հեղափոխությունից հետո շատ լավ են հասկացել, ըմբռնումով են մոտեցել, քանի որ ոստիկանը , մենք՝ քաղաքացիներից մեկն ենք, կանգնած ենք մեր քաղաքացիների կողքին, մենք բոլորի ոստիկանն ենք, անգամ՝ իրավախախտի ու հանցագործի : Բայց կան մարդիկ, որոնք հանդուրժողականությունը դիտում են որպես թուլություն, այո, ոստիկանությունը կիրառել ու կիրառելու են ֆիզիկական ուժ, որը թույլատրելի է, այդ թվում տարբեր միջոցներով, եթե դրա անհրաժեշտությունը լինի»:

Աղբյուր` Փաստինֆո