Փաստ ինֆո

Իջեւանում նախօրեին ցուցարարների եւ ոստիկանների միջեւ տեղի ունեցած բախումների հետեւանքով տուժել է 19 մարդ։ Այս մասին «Փաստինֆո»-ն տեղեկացավ Տավուշի մարզպետ Հայը Չոբանյանից։

«Գրանցված բուժօգնության դիմել է 12 ոստիկան և մեկ քաղաքացի։ Չգրանցված՝ տեղում դիմել է 6 քաղաքացի», - ասաց Տավուշի մարզպետ Հայկ Չոբանյանը։ Նա հաստատեց, որ տուժածների մեծ մասը ոստիկաններ են։

Նրա փոխանցմամբ՝ քաղաքացիներից մեկը փախչելու ընթացքում ընկել է և վնասվել. «Առանձնապես ծանր դեպք չի եղել։ Երկու ոստիկան իջևանցիներ են։ Մեկ ոստիկան գլխի հարված է ստացել։ Այս պահին գտնվում են հսկողության տակ», - ասաց մարզպետը, ավելացնելով, որ, բարեբախտաբար, անհանգստանալու կարիք չկա։

Ավելի վաղ Առողջապահության նախարարի մամուլի խոսնակ Ալինա Նիկողոսյանը ֆեյսբուքյան իր էջում գրել էր, որ վնասվածքները հիմնականում քերծվածքների կամ թեթև սալջարդերի տեսքով են. «Վերջիններս գտնվում են բժիշկների հսկողության տակ, մի մասը կրկնակի հետազոտությունից հետո դուրս կգրվի», - նշել էր մամուլի խոսնակը։

Ավելի վաղ «Փաստինֆո»-ն հայտնել է, որ Իջեւանում «փայտի գործով» զբաղվող մի շարք անձինք` մոտ 600 հոգի, փակել էին միջպետական ճանապարհը` պահանջելով անտառահատման արգելքի վերացում, արդեն հատված անտառանյութն անտառից դուրս բերելու իրավունք եւ հանդիպում այն պաշտոնյայի հետ, որը արգելել է անտառից փայտ դուրս բերել։ 

Աղբյուր` Փաստինֆո