Փաստ ինֆո

Ստեղծված ամենաթողության և Ոստիկանության դեմ հարձակումների պատճառներից մեկը Երևանի նախկին փոխոստիկանապետ Ռոբերտ Մելքոնյանը համարում է ՊՊԾ գնդի վրա հարձակումից հետո մեղավորներին ազատ արձակելը:

‹‹Գունդը գրավողները դատաքննության ժամանակ իրենց պահեցին լկտի, անբռնազբոս, ինքնագոհ։ Անընդհատ վիրավորում, լկտի ռեպլիկներ էին թողնում, նույնիսկ հայհոյում դատարանում գտնվող ոստիկաններին՝ ընդհուպ բարձրաստիճան սպաներին: Առանց ամոթի, առանց զղջումի և առանց ներողության››,-‹‹Փաստինֆո››-ի հետ զրույցում ասաց Մելքոնյանը:

Նա ընդգծեց, որ ազատության մեջ հայտնվելուն պես ՊՊԾ գնդի գրավման մեղավորները անարգել, հանգիստ ու գրեթե արտոնյալ կարգավիճակում սկսեցին հասարակական-քաղաքական գործունեություն ծավալել ՀՀ-ում և Արցախի հանրապետությունում՝ լկտիաբար փորձելով սեպ խրել արցախցիների ու հայաստանցիների միջև:

‹‹Իսկ ամենացավալին այն էր, որ նրանց այդ արարքները հասարակության մի ստվար զանգված արդարացնում, նույնիսկ հերոսացնում էր, մեղադրելով նախորդ իշխանություններին և ոստիկանությանը››,-նշեց :

Նրա խոսքով, Ոստիկանության հանդեպ ստեղծված վերաբերմունքին նպաստեց նաև այն հանգամանքը, որ ժողովրդին այնքան ասվեց իրենք են Հայաստանում բարձրագույն և միակ իշխանությունը, Հայաստանում իշխանությունը պատկանում է իրենց, որ նրանք ‹‹կուտը կերան››:

‹‹Ժողովուրդը մտածեց, որ ինքն է որոշողը, պատժողը, տերն ու տիրակալը, քանի որ ժամանակին անարգել, հաշվի չառնելով ոստիկաններին ճանապարհներ էր փակել, ԱԺ-ն էր շրջափակել, ՍԴ-ն, հանքավայրերը, դատարանները և ոչ մեկն իրեն չէր մեղադրել: Նա արդեն իրեն իրավունք վերապահեց հարձակվել ոստիկանների վրա ու չկատարել նրանց օրինական պահանջները››,-ասաց նախկին փոխոստիկանապետը :

Նա Իջևանում կատարված երեկվա իրադարձությունները մեկնաբանեց ասելով, որ դա անցյալ տարվանից սկսած ամենաթողության, հեղաշրջում կատարողների հետ համագործակցող տաքսիստներին ներելու, իշխանությունների կողմնակիցների խախտումների վրա աչք փակելու, ամբոխահաճո նպատակներով ժողովուրդ ու ժողովրդի իրավունք հասկացությունները անհարկի, հաճախակի օգտագործելու, շահարկելու և ֆիկտիվ, ձևական տնտեսական հեղափոխության արդյունք է:

Հեղինակ` Սոնա Գեւորգյան