Փաստ ինֆո

«Փաստինֆո»-ի հաղորդմամբ՝ Բարձրագույն դատական խորհուրդը քիչ առաջ որոշում կայացրեց իր այսօրվա նիստը անցկացնել դռնբաց։

Արդեն հայտնել ենք, որ նիստի մեկնարկին ԲԴԽ անդամ Նախշուն Տավարացյանը միջնորդել էր նիստը դռնփակ անցկացնելու՝ հղում անելով Վարչական դատավարությանը եւ իր իրավունքին։ Նշենք, որ այսօրվա նիստի օրակարգում է նրան լիազորություններից զրկելու հարցը։

ԲԴԽ անդամ Գրիգոր Բեքմեզյանը նշեց, որ կարեւոր են փաստերը, որոնք հիմք են հանդիսացել սույն նիստի հրավիրման․ «2018 թվականի նոյեմբերի 8-ին տեղի է ունեցել Դատավորների ընդհանուր ժողով, որի ժամանակ օրենքի ուժով Նախշուն Տավարացյանը ընտրվել է ԲԴԽ անդամ։ Չխորանալով, թե ինչ է տեղի ունեցել ժողովի ընթացքում, բայց վերջում՝ ժողովի արձանագրությամբ, ֆիքսվել է, որ նա հրաժարվել է երդվել որպես ԲԴԽ անդամ եւ ներկայացրել է իր հրաժարականը։ Փաստենք, որ նա ունեցել է երդվելու հնարավորություն, ինչից հրաժարվել է, ապա դիմել ԲԴԽ՝ իր հրաժարականն ընդունելու պահանջով»։

Գրիգոր Բեքմեզյանը ենթադրեց, որ ԲԴԽ-ի համար անհասկանալի է եղել նման դիմումը եւ որոշում չի կայացվել, ընդամենը խորհրդի նախագահը գրությամբ հայտնել է, որ եթե չի երդվել, ապա ԲԴԽ-ն ոչինչ անել չի կարող․ «Նոյեմբերի 15-ի նիստին ընդհանրապես որոշում չի կայացվել դիմումի հետ կապված, այնուհետեւ  դեկտեմբերի 21-ին տեղի է ունեցել Դատավորների ժողովի եւս մեկ նիստ, որում ընդհանրապես չի քննարկվել տիկին Տավարացյանի հարցը, քննարկվել է նոր անդամի ընտրության հարցը, բայց, քանի որ կողմերը չեն եկել ընդհանուր եզրակացության, որոշում չի կայացվել։ Եվ այս ընթացքում ԲԴԽ-ն շարունակել է գործել ճգնաժամային պայմաններում եւ քարկոծվել տարբեր մարդկանց կողմից»։

Բեքմեզյանն ընդգծեց, որ Դատավորների ժողովի վերջին նիստի ժամանակ որոշվել է, որ Նախշուն Տավարացյանը պետք է երդվի, որովհետեւ նոյեմբերի 8-ից նա ընտրված եւ ստանձնած է եղել իր լիազորությունները․ «ԲԴԽ-ն չի քննարկում Ժողովի այս որոշման իրավաչափությունը, դա մեզ համար ընդունելի է, բայց որոշման արդյունքում տեղի է ունեցել մամուլի ասուլիս, որում ներկա է եղել Տավարացյանը, եւ, որում Ժողովի նախագահը ֆիքսել է, որ տիկին Տավարացյանը, համաձայն Դատական օրենսգրքի, իր պաշտոնը ստանձնած է համարել այն պահից, երբ ընտրվել է, այսինքն՝ նոյեմբերի 8-ից, ինչի ուժով էլ միայն ձեւական առումով մնացել էր երդման արարողությունը։ Նման մոտեցումը, ըստ որի՝ նա իր պաշտոնը ստանձնել է նոյեմբերի 8-ին, չի հերքվել նաեւ Տավարացյանի կողմից»։

Բեքմեզյանն ասաց, որ սա նշանակում է, որ իրենք ունեն բոլոր հիմքերը՝ հավատալու եւ ընդունելու, որ նա ընտրված անդամ է նոյեմբերի 8-ից․ «Սա արձանագրված փաստ է, եւ մեզ մոտ հարց է առաջանում․ եթե նա իր լիազորությունները ստանձնել է նոյեմբերի 8-ից, ապա ինչո՞ւ մինչ այժմ որեւէ անգամ չի եղել ԲԴԽ նիստերին, սա շատ կարեւոր հարց է, քանի որ օրենքը հստակ սահմանում է, որ դադարեցվում են առնվազն երկու անգամ անհարգելի պատճառներով չներկայանալու դեպքում»։

Բեքմեզյանն ընդգծեց, որ Նախշուն Տավարացյանը չի ներկայացել որեւէ նիստի եւ չի ներկայացրել բացակայության հարգելի պատճառ, ինչի արդյունքում, ըստ իրեն, խախտվել են Դատական օրենսգրքի 86-ի 3-րդ մասի համապատասխան կետերը․ «Նման գործելաոճը խախտում է ԲԴԽ-ի նիստերի անցկացման իրավական հիմքերը եւ ԲԴԽ-ն պետք է իր կարծիքը հայտնի սրա վերաբերյալ։ Տիկին Տավարացյանը գոնե մեկ անգամ պե՞տք է գար ԲԴԽ, ասեր՝ ես ընտրվել եմ որպես անդամ, ինձ ծանուցումներ ուղարկեք։ Այս պարագայում ինչպե՞ս կարողն էր ԲԴԽ-ն ծանուցել նրան, եթե նա բոլոր հնարավոր տարբերակներով ընտրված անդամ չէ»։

Ըստ Բեքմեզյանի՝ այն հանգամանքը, որ նա չի ծանուցվել, չի կարող արդարացի պատճառ հանդիսանալ նիստերին չներկայանալու․ «Կան բոլոր հիմքերը, որպեսզի մենք դադարեցնենք տիկին Տավարացյանի լիազորությունները որպես ԲԴԽ անդամի, եւ մեր վերջնական դիրքորոշումը հայտնենք սրա վերաբերյալ»։

ԲԴԽ անդամ Հայկ Հովհաննիսյանն էլ իր հերթին ընդգծեց, որ Նախշուն Տավարացյանի փոխարեն կարող էր լինել իրենցից յուրաքանչյուրը․ «Այստեղ նրա անձի խնդիրը չէ, այլ ընտրված անդամի հետ կապված իրավակարգավորումները, եւ այս քննարկումները միտված են այդ հարցի լուծմանը»,-ասաց նա։

Հեղինակ` Միլենա Խաչիկյան