Փաստ ինֆո

Վճռաբեկ դատարանի՝ օրերս ձերբակալված պաշտոնատար անձին եւ նախկին փաստաբանին մեղադրանք է առաջադրվել։ Այս մասին «Փաստինֆո»-ի հարցմանն ի պատասխան՝ տեղեկացրեց Դատախազության հանրային կապերի բաժնի պետ Արեւիկ Խաչատրյանը։

Վերջինիս փոխանցմամբ՝ պաշտոնատար անձին մեղադրանք է առաջադրվել ՀՀ ՔՕ-ի 34-178-րդ հոդվածի 2-րդ մասի 5-րդ կետով, այն է՝ կաշառք ստանալու պատրվակով խարդախության փորձը։ Նախկին փաստաբանին մեղադրանք է առաջադրվել ՀՀ ՔՕ-ի 34-312-րդ հոդվածի 2-րդ մասով, այն է՝ խոշոր չափով կաշառք տալու փորձը։

Հիշեցնենք, որ հուլիսի 10-ին Հայաստանի Հանրապետության ազգային անվտանգության ծառայությունը հայտարարել էր, որ բացահայտել և կանխել է ՀՀ դատական համակարգի պաշտոնատար անձին առնչվող առերևույթ կոռուպցիոն բնույթի դեպք: ՀՀ ԱԱԾ մամուլի կենտրոնից հայտնել էին, որ ձեռք բերված նախնական տվյալների համաձայն՝ հասարակական կազմակերպության նախագահ, իրավաբանական բնույթի ծառայություններ մատուցող նախկին փաստաբանը ՀՀ քաղաքացու օգտին քաղաքացիական գործով բարենպաստ դատական ակտի կայացումն ապահովելու համար ՀՀ վճռաբեկ դատարանի պաշտոնատար անձին տվել էր կաշառք գումար: Գումարի փոխանցումն իրականացվել էր ԱԱԾ աշխատակիցների օպերատիվ վերահսկողության ներքո, որից անմիջապես հետո նշված անձինք բռնվել և բերման էին ենթարկվել: Կաշառքի առարկա գումարը հայտնաբերվել էր:

ԱԱԾ մամուլի խոսնակ Սամսոն Գալստյանից «Փաստինֆո»-ն տեղեկացավ, որ երկու մեղադրյալների նկատմամբ որպես խափանման միջոց ընտրվել է չհեռանալու մասին ստորագրությունը։

«Փաստինֆո»-ի տեղեկություններով` Վճռաբեկ դատարանի պաշտոնատար անձը աշխատակազմի քրեական գործերով գրասենյակի ղեկավար Արմեն Հարությունյանն է։ Նախկին փաստաբանը, ըստ մամուլի տեղեկությունների, Աշոտ Աթոյանն է։

Հեղինակ` Միլենա Խաչիկյան