Փաստ ինֆո

ՀՀ վարչապետը Նիկոլ Փաշինյանն ընդունում է, որ Հայաստանում վատ կառավարման խնդիր կա, բայց դա չի պայմանավորում երիտասարդ պաշտոնյաների անփորձությամբ: Այս մասին Փաշինյանն ասել է «Ազատություն» ռադիոկայանին տված հարցազրույցում:

«Կա՞ արդյոք այսօր Հայաստանում վատ կառավարում: Իհարկե, կա: Ինչ կապ ունի դրա հետ նոր երիտասարդ թիմը: Եկեք պատկերացնենք կառավարման համակարգը, դա 1-2 տոկոս նոր եկած երիտասարդ թիմ է, և 98 տոկոս կառավարման այն համակարգը, որ մենք ունեցել ենք նաև իշխանափոխությունից առաջ: Այստեղ խնդիրը ոչ միայն մարդկային է, այլև համակարգային, որովհետև մենք պայքարում ենք կոռուպցիայի դեմ, ասում ենք այն վատ երևույթ է, բայց մեզնից քչերն են նկատում, որ կոռուպցիան նաև կառավարման որոշակի համակարգ է, որովհետև ես՝ որպես պետական պաշտոնյա պետք է ընտրություն կատարեմ, թե ինչ ընթացք տամ խնդրին»,- ասել է Փաշինյանը:

Նա ընդգծել է, որ իրենց քաղաքական թիմն ապահովել է Հայաստանում ոչ բռնի, թավշյա հեղափոխության հաղթանակը և կարողացել է ինչ-որ առումով առաջնորդել, շարունակում է առաջնորդել ժողովրդին ու վայելում է ժողովրդի վստահությունը:

«Եվ այդ քաղաքական թիմն ունի բավարար հմտություններ երկիրը կառավարելու, և  հետհեղափոխությանը հաջորդած շրջանը դրա մասին է վկայում»,- նշել է Փաշինյանը:

Վարչապետը շեշտել է, որ վատ կառավարման խնդիրն  առաջին հերթին իշխանության օրակարգային խնդիրն է, և իրենք անընդհատ աշխատում են դրա վրա:

Աղբյուր` Փաստինֆո