Փաստ ինֆո

«Երբ չափանիշները չենք պահպանում, սխալներ ենք թույլ տալիս, ոչ մի Հանրապետական, ոչ մի կուսակցություն, որևէ մեկը ազդեցություն չունի Վենետիկի հանձնաժողովի և նմանատիպ կառույցների վրա»,-ֆեյսբուքյան ուղիղ եթերում այսօր ասաց «Լուսավոր Հայաստան» խմբակցության ղեկավար Էդմոն

Մարուքյանը՝ անդրադառնալով տարածված լուրերին, թե Վենետիկի հանձնաժողովի արձանագրության ձեւակերպումների հետ կապ ունի ՀՀԿ-ն։

Մարուքյանը նշեց, որ եթե Հայաստանը սխալ է անում, հանձնաժողովն արձանագրում է այն, եթե այնպիսի բան է անում, որ մտահոգիչ է՝ կառույցն ասում է, որ մտահոգիչ է։

Ըստ նրա՝ վերջին գործողություններն եղել են մտահոգիչ, հանձնաժողովն էլ ասել է, որ դրանք իրապես մտահոգիչ են: Էդ.Մարուքյանը նկատեց, որ Վենետիկի հանձնաժողովն Ալբանիայում աջակցել է վեթինգին, «դիզայն է արել այն», իսկ Հայաստանի պարագայում ասում է, որ բոլոր դատավորների վեթինգն անթույլատրելի է:

«Գիտե՞ք ինչից է, որ Հայաստանում ամեն մարդ իր գործով չի զբաղվում, և վեթինգի հետ կապված կոնկրետ այնպիսի մարդիկ էին այնպիսի մեկնաբանություններ տալիս, էքսպերտային լուրջ կարծիքներ հայտնում, որոնք ընդհանրապես իրավունքի, իրավաբանության հետ կապ չունեն»,-ասաց Մարուքյանը:

Նրա խոսքով, այդ մարդկանց տարատեսակ հայտարարությունները, դիլետանտական մոտեցումները վեթինիգի հետ կապված հանգեցրին նման եզրակացության:
«Մինչդեռ վեթինգը վարչապետի հայտարարած առաջնահերթությունն էր և իշխանությունները պետք է ամեն ինչ անեին, որ այդ նախագիծը պատրաստվեր, ներկայացվեր, կամ եթե ասվեց նախագծով չի արվելու, առանձին մարմին չի ստեղծվելու, ուրեմն դա վեթինգ չէ ի սկզբանե, պետք չէ ասել մենք վեթինգ ենք անելու»,-ասաց ԼՀԿ առաջնորդը:

Խոսելով ՍԴ-ի շուրջ ստեղծված իրավիճակի մասին՝ Մարուքյանը նշել է, որ Վենետիկի հանձնաժողովն արձանագրել է այն մտահոգությունները, որոնք իրենք հայտնել էին:

Նրա խոսքերով՝ Հանրապետականները հանիրավի հերոսացվում են, թե որքան հզոր են, որ ազդում են Վենետիկի հանձնաժողովի վրա, դա ուղղակի աբսուրդ է։ Ըստ նրա՝ նման հեղինակավոր կառույցները ազդեցությունից զերծ են, պարզապես պետք է նման սխալներ թույլ չտալ, ու ինչ-որ մեկին անիմաստ հերոս չդարձնել։

«Եթե Մարդու իրավունքների եվրոպական դատարանը մի օր Հայաստանի դեմ որոշում կայացնի՝ պետք է ասեն, թե հանրապետականները գնացին եվրոպական դատարանի վրա ազդեցի՞ն, ոչ։ Պետք է չափանիշները պահպանել, մարդու իրավունքի գերակայությունը, ժողովրդավարությունը հարգել եւ որեւէ միջազգային կառույց չի կարող մեզ հետ կապված մտահոգություն հայտնել։

Մանրամասները՝ տեսանյութում:

Աղբյուր` Փաստինֆո