Փաստ ինֆո

Իրավասու մարմինները պետք է հստակ տեղեկատվություն տրամադրեն՝ դատավոր Դավիթ Գրիգորյանի աշխատասենյակում կատարված խուզարկության վերաբերյալ, իսկ նախաքննական գաղտնիքի վրա հղում կատարելն այս պարագայում չի կարող ընդունելի լինել։ «Փաստինֆո»-ի հետ զրույցում ասաց միջազգային իրավունքի մասնագետ, «Իրավական ուղի» ՀԿ համահիմնադիր Ռուբեն Մելիքյանը։

Նշենք, որ ՀՔԾ-ն արդեն պաշտոնապես հաստատել է, որ երեկ խուզարկություն է կատարվել Երեւանի ընդհանուր իրավասության դատարանի դատավոր Դավիթ Գրիգորյանի աշխատասենյակում, որը նոր էր վերադարձել արձակուրդից։ Վերջինիս վարույթում է գտնվում ՀՀ երկրորդ նախագահ Ռոբերտ Քոչարյանի եւ մյուս երեք պաշտոնյաների գործը։ Դատավոր Գրիգորյանի մայիսի 18-ի որոշմամբ փոխվել էր Ռոբերտ Քոչարյանի խափանման միջոցը, իսկ մայիսի 20-ին՝ վարույթը կասեցել էր եւ գործն ուղարկվել Սահմանադրական դատարան։ Թեեւ վերաքննիչ քրեական դատարանը դրանք վերացրել է, բայց Սահմանադրական դատարանը որոշել է դատավորի դիմումը մասամբ վարույթ ընդունելու մասին։

«Հաշվի առնելով այն հանգամանքը, որ հանրային մեծ հնչեղություն է եղել, հաշվի առնելով այն հանգամանքը, որ կայացվել է գործող քաղաքական իշխանությանը ոչ հաճո որոշում, որ այդ որոշումից հետո ընդհուպ մինչեւ դատարաններն արգելափակելու հրահանգ է իջեցվել, ցանկացած գործողություն, ցանկացած միջամտություն, որ տեղի կունենա կոնկրետ դատավոր Գրիգորյանի մասով, պետք է ամենալուրջ հիմնավորումները ունենա եւ այդ հիմնավորումները պետք է ներկայացնել ամենասեղմ ժամկետներում եւ ամենայն մանրամասնությամբ»,-նշեց իրավապաշտպանը:

Ռոբերտ Քոչարյանի խափանման միջոցը փոխելու դատարանի որոշմանը հաջորդած վերոնշյալ գործողությունները հաշվի առնելով՝ Ռուբեն Մելիքյանի կարծիքով, լրջորեն մեծանում է հնարավոր ճնշման ռիսկը: Հետեւապես՝ այդ մտահոգությունը փարատելու համար պետությունը, ըստ նրա, պետք է շատ ավելի տեղեկատվական բնույթի լուրջ ջանքեր ձեռնարկի եւ այս դեպքում որեւէ հղումը նախաքննական գաղտնիքին, ուղղակի ընդունելի լինել չի կարող, քանի որ հանրությունն ունի տեղեկացված լինելու իրավունք, իսկ այս դեպքում նշված հանգամանքների բերումով մեծ է ռիսկը, որ պետությունը թույլ է տալիս կոպտագույն չարաշահում:

Ռուբեն Մելիքյանի խոսքով, «Իրավական ուղի» ՀԿ-ն ուշադրությամբ հետեւելու է այս գործընթացին.«Ես չէի ուզենա, որ մեր երկրում մարդիկ վերստին հիշեն 37 թվականը, մենք այդ ռեսուրսը չունենք եւ ուղղակի հիմա այլ ժամանակներ են, եթե որեւէ մեկի մտքով նման տարբերակներ անցնում է, ապա դա, վստահաբար, չի հաջողվելու»:

Աղբյուր` Փաստինֆո