Փաստ ինֆո

«Եթե դատարանը իրավական գնահատական տա և հիմնավոր ընդունի Արսեն Ղազարյանի վկայությունը, ապա կեղծ ցուցմունք տալու վերաբերյալ  Ոստիկանությունում հանցագործության մասին հաղորդում կներկայացնենք», - «Փաստինֆո»-ի հետ զրույցում ասաց «Սեքյուրիթի դրիմ» ընկերության նախկին տնօրենի օգնական Միքայել Պողոսյանը։

Հիշեցնենք, որ այսօր՝ հուլիսի 17-ին, Երևանի ընդհանուր իրավասության դատարանում տեղի է ունեցել «Սեքյուրիթի դրիմ» ընկերության  նախկին աշխատակից Սիրակ Գրիգորյանի ընդդեմ ընկերության  ներկայացրած հայցադիմումի գործով հերթական դատական նիստը։ Նա և ընկերության ևս 24 նախկին աշխատակիցներ ընդդեմ ընկերության հայցադիմում են ներկայացրել՝ պահանջելով անվավեր ճանաչել աշխատանքից ազատելու մասին հրամանները, վերականգնել նախկին աշխատանքին և հարկադիր պարապուրդի ամբողջ ժամանակահատվածի համար բռնագանձել միջին աշխատավարձ։ Աշխատակիցները պնդում են՝  մարտի 5-ին արգելափակվել են նրանց էլեկտրոնային անցագրերը և անհիմն հեռացրել աշխատանքից։

Այսօրվա դատական նիստում վկայություն է տվել «Սեքյուրիթի դրիմ» ընկերության խախտումների արձանագրման վարչության պետ Արսեն Ղազարյանը, ում զեկուցագիրը հիմք ընդունելով ՝ գործատուն աշխատանքից հեռացրել է ընկերության 25 աշխատակիցներին։ Համաձայն Արսեն Ղազարյանի զեկուցագրի՝ 2019թ.-ի մարտի 1-ին ընկերության  աշխատակիցները, այդ թվում հայցվոր Սիրակ Գրիգորյանը, ամբողջ օրը չեն ներկայացել աշխատանքի։ Նկատենք, որ աշխատակիցները պնդում են՝ Արսեն Ղազարյանը զեկուցագիրը կազմել է ընկերության ներկայիս տնօրեն Արթուր Պողոսյանի հարկադրմամբ, ուստի այն կեղծ է։

Գործով վկայի խոսքով՝ բողոքի ակցիայի պատճառ է դարձել մարտի 1-ին ստացված այն  տեղեկությունը, ըստ որի՝  աշխատավարձի հետ կապված խնդիր է լինելու։ «Մեր իրավունքները պաշտպանելու համար դուրս ենք եկել բողոքի ակցիա իրականացնելու և այդ օրն այլևս աշխատանքի չենք վերադարձել», - ասաց Արսեն Ղազարյանը։ Դատավորի հարցին՝ մարտի 1-ին Սիրակ Գրիգորյանը կատարե՞լ է իր աշխատանքային պարտականությունները, թե ոչ, վկան չկարողացավ հստակ պատասխանել. «Աշխատակազմը մեծ է, հստակ չեմ կարող ասել»։ Դատավորի այն դիտարկմանը, որ վերջինս զեկուցագրում նշել է՝ ի թիվս այլոց Սիրակ Գրիգորյանի անունը, Արսեն Ղազարյանը պատասխանեց. «Գրելու ընթացքում հիշողությունս լավ է եղել։ Եթե գրել եմ, ուրեմն այդպես է եղել»։ Արսեն Ղազարյանը հստակ չէր հիշում նաև, թե մարտի 1-ին երբ է սկսվել բողոքի գործողությունը. «Առավոտյան մինչև կեսօրն ընկած ժամանակահատվածը»։

Հայցվոր կողմի փաստաբան Արամ Ղլեչյանը դատարանին ներկայացրեց լրացուցիչ  փաստաթուղթ, որտեղ «Սեքյուրիթի դրիմ» ընկերության  անձնակազմի կառավարման բաժնի երկու աշխատակիցներ գրում են, որ մարտ ամսին գործող տնօրենի կողմից ստացել են կեղծ զեկուցագրեր կազմելու մասին ցուցում։ «Փաստինֆո»-ի հետ զրույցում Արամ Ղլեչյանը մանրամասնեց. «Հուլիսի 16-ին ընկերության երկու աշխատակիցները գրավոր դիմել են ինձ, որ տնօրեն Արթուր Պողոսյանի կողմից ցուցում են ստացել գրել զեկուցագիր այն մասին, որ աշխատակիցները մարտի 1-ին աշխատանքի չեն ներկայացել։ Վերջիններս հրաժարվել են դա անել»,-ավելացրեց փաստաբանը։

Ընկերության նախկին տնօրենի օգնական Միքայել Պողոսյանն էլ ընդգծեց, որ պատասխանող կողմի միակ ապացույցն Արսեն Ղազարյանի զեկուցագիրն է։ Մինչդեռ պարզելու համար աշխատակիցները գտնվել են աշխատանքի վայրում, թե ոչ, առկա են նաև տեսագրություններ.

«Ընկերության տիրապետության ներքո են գտնվում տեսաձայնագրող տեսախցիկները, որոնք ներկայացնելու դեպքում, կապացուցվեր, որ ընկերության աշխատակիցները, այդ թվում տվյալ գործով Սիրակ Գրիգորյանը, աշխատավայրում է եղել։ Անքննելի  ապացույց է նաև մուտքն ու ելքը հսկող էլեկտրոնային այցաքարտերը։ Դրանք չեն ներկայացվել, քանի որ պատասխանող կողմն իրեն վնաս ապացույցներ, բնական է, չի ներկայացնի», -նշեց Միքայել Պողոսյանը։

Սիրակ Գրիգորյանն ընդդեմ «Սեքյուրիթի դրիմ» գործով դատական ակտը կհրապարակվի օգոստոսի 2-ին։

Հեղինակ` Հասմիկ Կոշկարյան