Փաստ ինֆո

Վայոց ձորի բնակիչ, 20-ամյա զինծառայողը իր զինակցին՝ կոչումով սերժանտին սեռական բռնության ենթարկելու համար դատապարտվել է պայմանական ազատազրկման։

«Փաստինֆո»-ն ավելի վաղ հայտնել է, որ նախնական քննության տվյալներով` զինծառայողը 2018թ դեկտեմբերի 14-ից մինչև դեկտեմբերի 28-ը որպես դիտորդ ծառայության է նշանակված եղել զորամասի պաշտպանական շրջանում տեղակայված կրակային դիրքում: Դեկտեմբերի 16-ին` լուսադեմին, զինվորը մարտական դիրքի կացարանում սեքսուալ բնույթի համասեռական գործողություններ է կատարել իր կողքի քնապարկում քնած սերժանտի նկատմամբ` օգտագործելով նրա անօգնական վիճակը:

Զինվորին մեղադրանք էր առաջադրվել ՀՀ քրեական օրենսգրքի 139-րդ հոդվածի 2-րդ մասի 8-րդ կետով, այն է՝ զինծառայողի նկատմամբ բռնի կերպով սեքսուալ բնույթի գործողություններ կատարելը:

Մինչ դատաքննություն սկսելն ամբաստանյալը միջնորդել է դատաքննությունն անցկացնել արագացված կարգով՝ ընդունելով առաջադրված մեղադրանքը։ Արդյունքում դատարանը հիմնավորված է համարել առաջադրված մեղադրանքը, եւ նրան դատապարտել ՀՀ քրեական օրենսգրքի 139 հոդվածի 2-րդ մասի 8-րդ կետով նախատեսված արարքի համար։ Հաշվի առնելով կատարած արարքի հանրորեն վտանգավորության աստիճանը, հետևանքը, ինչպես նաև ամբաստանյալի անձը՝ պատասխանատվությունն ու պատիժը մեղմացնող հանգամանք է դիտել այն, որ նա նախկինում արատավորված չի եղել, «Սպառազինության խնամքի և սպասարկման համար» 01.12.2018թ. արժանացել է շնորհակալության, ընդունել է մեղքը և անկեղծորեն զղջացել կատարած արարքի համար՝ դատարանը նրան դատապարտել է 4 տարվա ազատազրկման եւ, միաժամանակ կիրառելով ՀՀ քրեական օրենսգրքի 70-րդ հոդվածը, վճռել է նշանակված պատիժը պայմանականորեն չկիրառել` փորձաշրջան նշանակելով մեկ տարի ժամկետով:

Նշենք, որ զինծառայողի վարքագծի նկատմամբ վերահսկողությունը հանձնարարվել է զորամասի հրամանատարությանը, իսկ զորացրվելուց հետո` ՀՀ ԱՆ պրոբացիայի պետական ծառայության` իր բնակության վայրի ստորաբաժանմանը։

Աղբյուր` Փաստինֆո