Փաստ ինֆո

«Ինֆորմացիայի մեծ պակաս կա, դեռ չգիտենք՝ ինչի համար է դա արվել, ինչ նպատակով եւ ինչ իրավական հիմքերով, ամեն դեպքում մի քիչ տարակուսելի է, որովհետեւ նման դեպք կարծես թե չենք ունեցել»,- «Փաստինֆո»-ի հետ զրույցում այս կարծիքը հայտնեց Ռոբերտ Քոչարյանի պաշտպաններից Հովհաննես Խուդոյանը՝ անդրադառնալով դատավոր Դավիթ Գրիգորյանի առանձնասենյակում խուզարկություն կատարելուն. «Տարակուսելի է այն իմաստով, որ մամուլում տարածված հաղորդագրությունից հասկացվում է, թե պրն Գրիգորյանը արձակուրդից վերադարձած է եղել, երբ այդ գործողությունը իրականացվել է, իսկ եթե արձակուրդից վերադարձած է եղել, ուրեմն՝ ենթադրվում է, որ մեր միջնորդություններն էլ պետք է քննության առներ, իսկ աշխատասենյակի կնիքելը խոչընդոտում է դրան»,-ասաց Խուդոյանը։

Նա նշեց, որ առաջիկա օրերին պարզ կլինի այդ գործողությունների իրավաչափությունը. «Ամեն դեպքում դատարանների նկատմամբ ճնշումները միայն այս գործողությամբ չէ, որ մեզ համար ակնհայտ են եղել,  նույնիսկ եթե այս գործողությունը լինի լրիվ իրավաչափ, մենք մեր կասկածներն  էլի չենք կարող փարատել, որովհետեւ նախկինում տեսել ենք՝ այդ ճնշումները ոնց են եղել, այսինքն՝ մեր գործով դատավորների նկատմամբ ցանկացած միջամտություն այդպիսի կասկած է հարուցում»,- ասաց նա։

Ավելի վաղ հայտնել ենք, որ երեկ ՀՔԾ աշխատակիցները խուզարկություն են իրականացրել Երեւան քաղաքի ընդհանուր իրավասության առաջին ատյանի դատավոր Դավիթ Գրիգորյանի աշխատասենյակում: ՀՔԾ մամուլի խոսնակ Մարինա Օհանջանյանը «Փաստինֆո»-ի հետ զրույցում ասել էր, որ խուզարկությունը իրականացվել է ՀՔԾ-ում քննվող քրեական գործի շրջանակում, սակայն նշել էր, որ այլ մանրամասներ այս պահին չեն կարող հայտնել։

Հեղինակ` Միլենա Խաչիկյան