Փաստ ինֆո

Հունիսի 8-ին Երեւանում տեղի ունեցած խուլիգանության դեպքի առթիվ հարուցված քրեական գործի շրջանակում ԱԺ նախկին պատգամավոր Արտակ Սարգսյանը՝ «ՍԱՍ»-ի Արտակը, հայտնել է, որ ՀՀ վերադառնալուն պես կներկայանա Քննչական կոմիտե։ Այս մասին «Փաստինֆո»-ի հարցմանն ի պատասխան՝ տեղեկացրեց Քննչական կոմիտեի տեղեկատվության եւ հասարակայնության հետ կապերի բաժնի պետի պաշտոնակատար Նաիրա Հարությունյանը. «Գործով քննիչը հեռախոսազրոց է ունեցել Արտակ Սարգսյանի հետ, ով հայտնել է, որ գտնվում է հանրապետությունից դուրս և վերադառնալուն պես կներկայանա նախաքննական մարմին»։

Հարությունյանը հայտնեց նաեւ, որ նա վերադարձի ժամկետներ չի նշել։ Ինչ վերաբերում է գործով դատավարական կարգավիճակ ունեցող անձանց, Հարությունյանի խոսքով՝ այդպիսիք այս պահին չկան։

Ավելի վաղ հայտնել ենք, որ հունիսի 5-ին Երեւանի կենտրոնում միջադեպ է տեղի ունեցել Արտակ Սարգսյանի մասնակցությամբ։ Մասնավորապես, միջադեպը գրանցվել է Իսահակյան փողոցում գտնվող «Terrazza» ռեստորանի տարածքում: Դեպքի ականատեսներից մեկը «Փաստինֆո»-ին պատմել էր, որ Արտակ Սարգսյանը ռեստորանում մենակ չի եղել, այնտեղ են գտնվել նաեւ այլ անձինք, որոնց թվում էր նաեւ ռուսաստանահայ գործարար Արամ Քոչարյանը։ Ռեստորանի այցելուները հանկարծակիի են եկել ԱԺ նախկին պատգամավորի բղավոցներից, ով դուրս է եկել ռեստորանի բացօդյա տարածք ու թիկնազոր կանչել։ Կարճ ժամանակ անց ռեստորան էին ժամանել նաեւ ոստիկաններ, որոնց թվում էին տարբեր ստորաբաժանումների ներկայացուցիչներ։ Ըստ տեղեկությունների՝ միջադեպի ժամանակ նաեւ հարվածել էին Արտակ Սարգսյանին։ 

Ոստիկանությունից ստացված գրավոր պատասխանից «Փաստինֆո»-ն տեղեկացել էր, որ Արտակ Սարգսյանը նյութերի նախապատրաստման փուլում հրավիրվել է բացատրություն տալու։

Դեպքի առթիվ հունիսի 8-ին հարուցվել է քրեական գործ ՀՀ քրեական օրենսգրքի 258–րդ հոդվածի 4-րդ մասով, այն է՝ խուլիգանությունը, որը կատարվել է զենքի կամ որպես զենք օգտագործվող առարկաների գործադրմամբ։

Հեղինակ` Միլենա Խաչիկյան