Փաստ ինֆո

«Մարդու իրավունքների պաշտպանի գրասենյակում անհրաժեշտություն կա վարույթ հարուցելու, եւ իրավունքի խախտման վերաբերյալ ՄԻՊ-ի հայտարարությունը գուցե շատ օգտակար լիներ այս պահին»,- «Փաստինֆո»-ի հաղորդմամբ՝ այս մասին լրագրողների հետ զրույցում այսօր հայտարարեց Մանվել Գրիգորյանի պաշտպաններից Արսեն Մկրտչյանը. «Իհարկե, բառացիորեն նման դիմումով չեմ դիմել, բայց պրն Բաղդասարյանի հետ գրություն ենք ուղարկել գրասենյակ, եւ ես կարծում եմ, որ կլինի հերթական այցը, ինչի համար շնորհակալություն կհայտնեմ Արման Թաթոյանին. նա ՀՀ ամենահաջողված օմբուդսմեններից է»։

Լրագրողի այն հարցին, թե կոնկրետ ինչ խախտման մասին է խոսքը, Արսեն Մկրտչյանը պատասխանեց. «Քաղաքացիական հիվանդանոց տեղափոխելը ինքնին հարցի լուծում չէ, եւ այն բավարար բուժումը, որ նա կարող է ստանալ ազատության մեջ, չի կարող ստանալ ՔԿՀ անվտանգության աշխատակցի առկայության դեպքում, եւ երբ գալիս է հոգեբանն ու ասում է, որ պետք է աշխատի առանձին, նա դրա հնարավորությունը չունի»։

Արսեն Մկրտչյանի խոսքով՝ փաստ է, որ Մանվել Գրիգորյանի առողջությունը գնալով վատթարանում է. «Ես չգիտեմ, թե ինչ եզրակացության կգա միջգերատեսչական հանձնաժողովը, որովհետեւ ունենք դառը փորձ նրա, որ այդ փորձաքննությունն անցկացվում է ճնշումների տակ»։

Լրագրողի դիտարկմանը, թե այդ փորձաքննության եզրակացության տակ ստորագրել է նաեւ Մանվել Գրիգորյանի բժիշկը՝ Արտակ Մանուկյանը, հետեւաբար՝ ճնշումներ, ըստ պաշտպանի, նաեւ նրա՞ վրա են եղել, Արսեն Մկրտչյանն արձագանքեց՝ ասելով, որ չի ուզում սլաքներ ուղղել որեւէ մեկի ուղղությամբ. «Ես հայտարարել եմ եւ հայտարարում եմ այն, ինչի ականատեսն եմ եղել. այդ փորձաքննությունն անցկացվել է ոչ ստանդարտ ռեժիմով՝ հունվար ամսին, ոչ աշխատանքային օրով, եւ ամեն ինչ վերահսկվել է թե հատուկ ծառայությունների, թե վերադաս մարմինների կողմից, եւ բժշկական ղեկավարները հատուկ զգուշավորություն են դրսեւորել, ինչն արտահայտվել է հետեւյալ նախադասությունով. «Ուշադիր եղեք, հանկարծ ավել բան չգրեք, ավելի լավ ա՝ եղածից մի բան պակաս գրենք, չընկնենք շառի մեջ»»։

Լրագրողի այն հարցին՝ արդյո՞ք Մանվել Գրիգորյանն անբասիր կենսագրություն է ունեցել մինչ կալանավորվելը, եւ եթե այո, ապա ինչո՞վ է պայմանավորված այսօր իր դեմ այդքան հնչող դժգոհությունները, պաշտպան Արսեն Մկրտչյանը պատասխանեց՝ ասելով, որ դա պայմանավորված է քաղաքական լկտի պատվերով. «Կա պահանջ, որը որ հանրային պահանջ չէ, մարդկային չէ, փոքրամասնությանը չէ, դա մեկ կենտրոնից հատուկ ուղղորդված պահանջ է, որը որ կատարվել է»։

Մեր այն հարցին, թե ըստ պաշտպանների՝ որտեղի՞ց է դա ուղղորդված, Արսեն Մկրտչյանը չպատասխանեց. «Այդ մի հարցը թողենք բաց»,-ասաց նա։

Խոսելով Մանվել Գրիգորյանի եղբորորդու՝ 25 տարվա վաղեմության գործի վերաբացումից, Արսեն Մկրտչյանն ասաց, որ Մանվել Գրիգորյանն այդ գործից տեղյակ է, սակայն նա չի հարցաքննվել. «Խելքին մոտ բաներ չեն, եւ ինչպես այս ողջ մեղադրանք է հորինված, այդպես էլ դա. ո՞նց կարելի է այդպիսի բաները  մեկնաբանել»։ Ըստ պաշտպանի՝ երկրում տենդենց կա՝ նախկին իշխանությունների կողմնակիցների գործերը, որոնցով նրանք դատապարտվել են եւ պատիժը կրել, պետք է վերաբացել, ասել՝ ձեզ լավ չեն պատժել, պետք է կրկնակի պատժել, իսկ եթե ներկայիս իշխանության ներկայացուցիչն է նախկինում պատժվել, ոչ ոք չի ասում՝ գուցե դուք էլ եք քիչ նստել, եկեք՝ ձեր գործերն էլ վերաբացենք»։

Ըստ պաշտպանի՝ նախաքննության ընթացքում Մանվել Գրիգորյանը գտնվում էր այնպիսի պայմաններում, որում անգամ դատապարտյալը չի գտնվում, եւ նրա հանդեպ հատուկ վատ  վերաբերմունք կա. «Եթե ինչ-որ բան մեկ այլ կալանավորի կարելի է, Մանվել Գրիգորյանին չի կարելի, համենայն դեպս, մինչ Քրեակատարողական վարչության նոր պետի նշանակումը այդպես է եղել։ Դուք քիչ գիտեք հայտնի անձինք, որոնք կալանքի տակ են գտնվել, եւ որոնց նկարել են, այն հայտնի նկարը, որ լրատվամիջոցներով տարածվեց, միակը չէ, եւ այդ վերաբերմունքը մենք մինչ օրս էլ տեսնում ենք, իսկ դրա դեմ մենք գործողություններ չձեռնարկեցինք, որովհտեւ դրա հետեւանքները ավելի բացասական կլինեին»։

Արսեն Մկրտչյանը նաեւ հայտարարեց, թե ինքը համոզված է, որ իր հանդիպումները Մանվել Գրիգորյանի հետ այսօր ոչ միայն ձայնագրվում են, այլ նաեւ՝ տեսաձայնագրվում. «Բայց մենք չենք էլ ուզում այդ մասին խոսել. մարդուն մի տարի պահում են կալանքի տակ չարած բանի համար, ապրել-մեռնելու պայքար ենք վարում»։

Հարցին՝ եթե համոզված է, այդ դեպքում ինչու չի դիմում համապատասխան մարմիններին, պաշտպանը պատասխանեց, որ դա հենց համապատասխան մարմինների հանձնարարությամբ էլ արվում է. «Դուք ուզում եք՝ ես բողոքեմ գլխին, թե պոչդ ի՞նչ է անում»։

Արսեն Մկրտչյանը նաեւ զավեշտալի համարեց խափանման միջոցի վերաբերյալ միջնորդություններին նորրից անդրադառնալը, բայց ասաց, որ ուրիշ տարբերակ չունեն. «Նաեւ ՄԻԵԴ ենք դիմելու ոչ միայն կալանքի հարցով, այլ մի քանի բողոքներով, այդ թվում՝ ենթադրում եմ նաեւ՝ փաստաբանի գործունեությանը խոչընդոտելու առիթով»,-ասաց նա։

«Փաստինֆո»-ի այն հարցին՝ խոսքը Մանվել Գրիգորյանին տեսակցել չթողնելո՞ւ մասին է, Արսեն Մկրտչյանը պատասխանեց, որ եւ դրա, եւ առհասարակ փաստաբանի նկատմամբ վերաբերմունքի մասին. «Կարծես թե ես հայտնվել եմ այն վիճակի մեջ, որ երբ նյութեր են նախապատրաստվում կամ ինչ-որ գործ է հարուցվում, չեմ բողոքում ոչ թե որովհետեւ բողոքի հիմք չունեմ, այլ եթե ես շարունակեմ այդ ճանապարհով, իմ վստահորդի նկատմամբ կուժեղացվեն ճնշումները, եւ իր նկատմամբ վերաբերմունքն ավելի բացասական կլինի»,-ասաց նա։

Հեղինակ` Միլենա Խաչիկյան