Փաստ ինֆո

Վարչապետ Նիկոլ Փաշինյանի գլխավորությամբ կառավարությունում տեղի է ունեցել ճանապարհային երթևեկության անվտանգության հարցերի վերաբերյալ քննարկում։ Քննարկման նախաձեռնող, ԱԺ «Իմ քայլը» խմբակցության պատգամավոր Սիսակ Գաբրիելյանն այսօր ասուլիսին ասել է, որ միայն խոսքով չսահմանափակվելու համար վարչապետի հրահանգով, ամենայն հավանականությամբ, կստեղծվի աշխատանքային խումբ, որը խնդիրների լուծման ժամկետներ կսահմանի և կորոշի, թե ովքեր են պատասխանատու լինելու դրանց կատարման համար: Պատգամավորի խոսքով՝ հանդիպման ժամանակ վարչապետի կողմից ներկայացվել է օրենսդիրի և գործադիրի մշակած բարեփոխումների ծրագիրը։

«Գիտեք, բալային համակարգն է, այն արդեն ուղարկվել է խորհրդարան: Ի՞նչ է այն իրենից ներկայացնում, դա լրացուցիչ պատասխանատվության միջոց է: Ես երկու կատեգորիայի վարորդների եմ հանդիպել, ովքեր կարող են մեքենայի պահարանից ցույց տալ «դափոնով» ակտեր, իրենք ասում են՝ « ես մեկա գույք չունեմ, ԴԱՀԿ-ն չի կարող ոչինչ առգրավել, և իրենք շարունակաբար խախտում են կանոնները, և կա մեկ այլ վարորդների խումբ՝ ժողովրդի լեզվով ասած ունևոր մարդիկ, ովքեր ասում են՝ «դե լավ խախտում եմ, երբ կարձանագրվի կմուծեմ», և այդ, 10-20 հազար դրամը եղանակ չի փոխում իրենց կյանքում:

Բալային համակարգը լրացուցիչ պատժամիջոց է: Որոշակի խախտումների դեպքում՝ կախված հանրային վտանգավորությունից, բալեր դուրս կգան, արդյունքում վարորդը որոշակի ժամանակով կզրկվի վարորդական իրավունքից: Երկարաժամկետ լուծումներից՝ ՃՈ-ն և Պարեկային ծառայությունը լուծարվելու են, ստեղծվելու է մեկ ընդհանուր մարմին, որի արդյունքում կավելանան շրջիկ մեքենաները, ինչը կբերի վարորդների զգոնությանը: 3-րդը ես պայմանականորեն անվանել եմ Հանրային վերահսկողության գործիք, եթե վարորդները տեսնում են խախտում, չպետք է անտարբեր մնան, իրենք էլ կարող են մասնակից լինել դրա կարգավորմանը»:

«Ճանապարհային անվտանգության ազգային խորհուրդ» ՀԿ-ի ղեկավար Պողոս Շահինյանի խոսքով՝ վարորդը ճանապարհից օգտվողներից մեկն է, իսկ հետիոտները չեն պատկերացնում վարորդի վիճակը, չէ որ նա էլ մարդ է և կարող է սխալվել.

« Վարորդներն իրենց հերթին բողոքում են հետիոտներից։ Հետիոտները չեն նայում որտեղով են անցնում, հագուստի գույնի հետ կապված խնդիր կա: Վարորդն էլ մարդ է և կարող է սխալվել, բայց նրա սխալը չպետք է մյուսի կյանքն արժենա: Դրա համար կան, օրինակ, «պառկած ոստիկաններ», բայց դրանք բավարար չեն։ Մենք վարչապետին համալիր մոտեցումներ ենք առաջարկել»:

Բանախոսը միաժամանակ հիշեցրեց, որ ամեն տարի վթարների պատճառով ամբողջ աշխարհում զոհվում է շուրջ 1.3 միլիոն մարդ, ընդ որում՝ զոհերի մեջ մեծ թիվ են կազմում երեխաները։

Հեղինակ` Անահիտ Հովհաննիսյան