Փաստ ինֆո

5 երեխաների հայր նախկին սպա Մխիթար Ալումյանը վերսկսել է հացադուլը։ Նա արդեն երրորդ անգամ է Պաշտպանության նախարարության դիմաց դիմում նման քայլի: Բազմազավակ սպան բողոքում է, որ դուրս է մնացել զինծառայողների բնակապահովման պետական ծրագրից, քանի որ դիրքերում է եղել, չի հասցրել ժամանակին փաստաթղթերը ներկայացնել: Պնդում է՝ այն տանը , որտեղ հիմա ինքն ու իր երեխաներն են ապրում, նվազագույն պայմաններ չկան:

Նախորդ հացադուլը 19 օր է տևել, հուլիսի 2-ին Մխիթար Ալումյանի հետ հանդիպել էր Դավիթ Տոնոյանը, , ինչը «Փաստինֆո»-ի հետ զրույցում հաստատել է նաեւ ՊՆ մամուլի խոսնակ Արծրուն Հովհաննիսյանը։

Հանդիպումից հետո սպան դադարեցրել հացադուլը, բայց հիմա նորից բողոքում է։ Ըստ նրա՝ նախարարը խոստացել էր, որ 2-3 օրում խնդիրը կլուծի, քայլեր կձեռնարկի.

« Խաբում են ինձ, արդեն հստակ խաբում են: Խոստացել են, որ տանս համար սեփականշնորհման վկայական կհանեն, հողս կսեփականացնեն, ինձ էլ 20.000 դոլար կտան, որ ես ինքս տունս սարքեմ և նրանց լումա-լումա հաշվետվություն տամ»,- ասաց Մ.Ալումյանը:

Նրա փոխանցմամբ՝ իրենց մատնանշած ժամկետը վաղուց ավարտվել է, ու ինքն այլևս ՊՆ-ին չի վստահում.

«Էլ չեմ գնալու ստեղից, իրենց ոչ մեկի խոսքին չեմ հավատում: Պրիստուպներ ունեմ ահավոր: Ինչ եկել եմ ոչ ոք չի մոտեցել ինձ: Ասես ոչ խոսք են տվել, ոչ ես էլ ստեղ եղել եմ: Մինչև վերջ եմ մնալու, մեռնել մեռնել է»:

ՊՆ մամուլի խոսնակ Արծրուն Հովհաննիսյանը «Փաստինֆո»-ի հետ զրույցում վստահեցրեց՝ խնդիրը լուծելու համար քայլեր ձեռնարկվում են.
«Ոչ մեկ իրեն ոչ մի բան չի կարող խոստանալ օրենքից դուրս, Դավիթ Տոնոյանը ոչ մի անօրինական բան չի կարող անել: Խոստացել է, որ կփորձի օգնել բարերարի միջոցով, այդպես էլ կա, այդպես էլ լինելու է: Քայլեր են ձեռնարկվում գումարը հայթայթելու համար: Եթե հնարավոր լիներ օրենքով հարցը լուծել վաղուց լուծած կլինեինք»:

Հիշեցնենք՝ նախորդ հացադուլից առաջ ինքնահրկիզման փորձ էր արել զորացրված սպան: ՊՆ մարդու իրավունքների պաշտպանության բարեվարքության կենտրոնի պետ, գնդապետ Ալեքսանդր Ավետիսյանը հանդիպել էր նրա հետ: Խոստացել էին խնդիրը լուծել՝ 5-10 հազար դոլար էին առաջարկել: Հրաժարվել էր, ասում էր՝ իր հասանելիքն ավելին

Հեղինակ` Անահիտ Հովհաննիսյան