Փաստ ինֆո

Քաղաքագետ Աղասի Ենոքյանը կարծում է, որ Վենետիկի հանձնաժողովը բավականին կոշտ գնահատական տվեց իշխանությունների գործողություններին: Նա ‹‹Փաստինֆո››-ի հետ զրույցում հատկապես կարևորեց ՍԴ դատավոր Վահե Գրիգորյանի հայտարարության վերաբերյալ հանձնաժողովի դիրքորոշումը:

‹‹Կարծում եմ, որ շատ կարևոր էր Վահե Գրիգորյանի որպես ՍԴ նախագահ ինքնահռչակման խնդրի վերաբերյալ հայտարարությունը, որտեղ պարզ հիմնավորումով հանձնաժողովը դա մերժում էր՝ շատ լուրջ վտանգ համարելով Հայաստանի պետականության համար››- ասաց Ենոքյանը:

Պատասխանելով հարցին՝ արդյոք այդ դիրքորոշումը կարող է ազդեցություն ունենալ պետական կառույցների կողմից Վահե Գրիգորյանի նամակին սպասվելիք արձագանքին, Ենոքյանն ասաց, որ կառույցները պարտավոր չեն արձագանքել դրան, բայց եթե որոշեն արձագանքել, ապա հաստատապես հանձնաժողովի հայտարարությունն իր ազդեցությունը կունենա:

‹‹Այստեղ բավականին հստակ իրավական գնահատական է տրվում և այն հաստատ ազդեցություն կունենա››,-ասաց քաղաքագետը:
Վենետիկի հանձնաժողովը նաև արձանագրել էր, որ Փաշինյանը դատական համակարգը խիստ քննադատության ենթարկեց Ռ. Քոչարյանին անձնական երաշխավորությամբ ազատ արձակելու դատարանի որոշումից հետո:

Քաղաքագետը կարծում է, որ հանձնաժողովը դատական համակարգի բարեփոխումներում քաղաքական գործընթացների առկայություն է տեսել:

‹‹Հայտարարությունում նշվում է, որ դատաիրավական համակարգի բարեփոխումները պետք է լինի Սահմանադրության և օրենքների շրջանակներում, այսինքն արդեն իսկ ակնարկ է՝ ամեն բան չէ, որ գնում է օրինական ճանապարհով››,-ընդգծեց Ենոքյանը:

Խոսելով Հայաստանում վեթինգի իրականացման մասին, նա նշեց՝ ստեղծված իրավիճակը խոսում է այն մասին, որ բոլորը սպասում են Նիկոլ Փաշինյանի կարծիքին:

‹‹Եթե նա ուշացնում է կարծիք հայտնելը, դա մի կողմից նշանակում է, որ բոլորին, այնուամենայնիվ, պահում է վեթինգ կիրառելու սարսափի տակ, մյուս կողմից ինքն առանձնապես չի ուզում այդ պրոցեսին գնալ››,-ասաց քաղաքագետը, ապա ավելացրեց, որ իր կարծիքով վեթինգի հետ կապված որոշումն անգամ վերջնական չէ և պարզ չէ արդյոք այն կլինի՞, նպատակն ու վերջնախնդիրն էլ հստակ չէ:

Քաղաքագետն այս ամենը կապում է Ռ. Քոչարյանի գործի հետ:

Հեղինակ` Սոնա Գեւորգյան