Փաստ ինֆո

«Ես ինքս առիթ եմ ունեցել այդ թեմայով մի քանի անգամ խոսել, ես ինքս չեմ համարում, որ ճգնաժամ է, ես գիտեմ, որ խնդիրներ կան, որոնք պետք է ուղղակի լուծվեն»,- «Փաստինֆո»-ի հետ զրույցում ասել է իշխող «Իմ քայլը» խմբակցության պատգամավոր Հովիկ Աղազարյանը՝ անդրադառնալով Հայաստանում նախատեսված վեթթինգի գործընթացի եւ հնարավոր սահմանադրական ճգնաժամի վերաբերյալ Վենետիկի հանձնաժողովի 119-րդ նստաշրջանի (հունիսի 21-22) արձանագրությանը։

Հիշեցնենք, արձանագրության մեջ Վենետիկի հանձնաժողովը նշել էր, որ Սահմանադրական դատարանի դատական կազմի հետագա պաշտոնավարումը նախատեսող դրույթը (ՀՀ Սահմանադրության 213-րդ հոդված) «հստակ» և «աներկբա» է։ Հանձնաժողովը նաեւ մտահոգիչ էր գնահատվել ՍԴ դատավոր Վահե Գրիգորյանի հայտնի պնդումները ՀՀ խորհրդարանի կողմից ողջունելը։

Հովիկ Աղազարյանն ասաց, որ Վենետիկի հանձնաժողովի դիրքորոշմանը գնահատական տալ չի կարող, քանի որ այդ արձանագրությունը չի կարդացել, բայց կարծում է, որ Սահմանադրական դատարանն իր գործառույթը կատարում է եւ ճգնաժամ չկա, կան խնդիրներ, որոնք քաղաքական են: «Կան խնդիրներ հատկապես այն մասով, որ ՍԴ անդամների մի մասը, և հատկապես նախագահը՝ Հրայր Թովմասյանը, հանդիսանում են հին քաղաքական թիմի, հին իշխանության ամենակարկառուն դեմքերից մեկը, ինչպես նաեւ ճարտարապետը այն իրողությունների, որոնց ժառանգորդը նաեւ մենք ենք այսօր, որոնք փոփոխման կարիք ունեն եւ իրենք քաղաքական նկատառումներից ելնելով, պետք է հրաժարական տան, դա ուրիշ հարց է»,-ընդգծեց պատգամավորը:

«Փաստինֆո»-ի դիտարկմանը, թե ստացվում է, հարցը ոչ թե իրավական, այլ քաղաքական հարթությունում է, Հովիկ Աղազարյանը արձագանքեց. «Դա իմ անձնական տեսակետն է: Ես գտնում եմ, որ եթե մենք շարժում կազմակերպեցինք եւ մերժեցինք Սերժին, դա չի նշանակում, որ մենք մերժեցինք Սերժ Սարգսյան անձնավորությանը, դա նշանակում է՝ մենք մերժեցինք Սերժ Սարգսյան թիմին ամբողջությամբ եւ ոչ ոք չի կարող վիճարկել, որ Հրայր Թովմասյանը հանդիսանում է Սերժ Սարգսյանի քաղաքական թիմի ամենաակտիվ անդամներից մեկը»:

Ինչ վերաբերում է վեթթինգի գործընթացին եւ Վենետիկի հանձնաժողովի արձանագրմանը, թե Եվրոպայից ժամանած պատվիրակության հետ քննարկումների արդյունքում ՀՀ իշխանություններն ընդունել են, որ գործող դատավորների համընդհանուր վեթթինգը ո՛չ անհրաժեշտ է, ո՛չ էլ օգտակար եւ, որ ՀՀ իշխանությունները համաձայնության են եկել, որ վեթթինգի փոխարեն պետք է ուժեղացնել կարգապահական ընթացակարգերը, Հովիկ Աղազարյանն ասաց. «Ես այդ հայտարարությունն ինքնս աչքի չեմ անցկացրել, բայց ինչ վերաբերում է վեթթինգին, չէ՞ որ այստեղ կարեւորը նպատակն է, հիմա, թե մենք ինչ ճանապարհով այդ նպատակին կհասնենք, դա այլ հարց է: Բնականաբար, օրենքներով նախատեսված եւ միջազգային եւ մեր Սահմանադրությամբ նախատեսված օրենքների շրջանակներում պետք է լինի, բայց ճանապարհները , թե ինչ նպատակներով մենք կհասնենք դատական համակարգի բարելավմանը եւ ժողովրդի կողմից նրա նկատմամբ վստահության բարձրացմանը , կարող են տարբեր լինել: Մենք հաշվի կառնենք Վենետիկի հանձնաժողովի խորհուրդը, բնականաբար, որովհետեւ, մենք ապրում ենք աշխարհում եւ տարբեր թելերով կապված ենք միջազգային հանրության հետ եւ չենք կարող հաշվի չառնել, բայց այն նպատակը, որ մենք հետապնդում ենք, այդ նպատակին պետք է գնանք»:

Անդրադառնալով դատարաններն արգելափակելու վարչապետի կոչի վերաբերյալ Վենետիկի հանձնաժողովի արձագանքին, Հովիկ Աղազարյանը նշեց.«Վենետիկի հանձնաժողովը չի կարող հաստատում անել, որ ՀՀ դատավորների մեծ մասը խառնված են կոռուպցիոն տարբեր սխեմաների մեջ եւ իր դատողություններն անում է ՝ ելնելով այդ հանգամանքից, բայց մենք ՝ ՀՀ քաղաքացիների մեծամասնությունը, վստահ ենք եւ գիտենք, որ դատական համակարգը մեր հասարակության մեջ ամենակոռումպացված շերտն է եւ հետեւաբար, որպես քաղաքական ակտ մի քանի ժամով դատարանների դռները փակելը չեմ կարծում, որ շատ ծանր հարված էր մեր իրավական համակարգին, դա ընդամենը քաղաքական ակտ էր, ճիչ՝ հասարակությանը մեկ անգամ եւս տեղյակ պահելու կամ հիշեցնելու խնդիրների մասին, եւ որպես սկիզբ, այդ խնդիրների լուծման ճանապարհը սկսելու»:

Ըստ պատգամավորի, Վենետիկի հանձնաժողովի կամ միջազգային այլ կառույցի դիրքորոշումները քննարկելիս պետք է, անպայման, տեղայնացնել դրանք եւ հաշվի առնել Հայաստանի իրողությունները:

Աղբյուր` Փաստինֆո