Փաստ ինֆո

Վենետիկի հանձնաժողովի այս հայտարարությունը նորություն չէ, որովհետև այն դեռ բանավոր կերպով հայտարարվել է դեռևս հունիսի 20-21-ին տեղի ունեցած հանձնաժողովի նիստում։ Այս մասին «Փաստինֆո»-ի հետ զրույցում ասաց «Իմ քայլ»-ը խմբակցության պատգամավոր Սիսակ Գաբրիելյանը։ Նա, անդրադառնալով Վենետիկի հանձնաժողովի փաստաթղթին, ընդգծում է, որ նրանք վեթթինգ ասվածը հասկանում են որպես ալբանական փորձ։ Դա էլ իրենից ենթադրում է, որ բոլոր դատավորները դուրս են գալիս և անցկացվում է այդ գործընթացը։

«Իրենք կարծում են, որ սա արդյունավետ և օգտակար չէ, ինչի մասին նաև հայտարարել է խմբակցության ղեկավար Լիլիթ Մակունցը՝ նշելով, որ վեթթինգի մասին առանձին օրենք չի լինելու։ Մեր նպատակներն իրականացնելու ենք ներկայիս գործող օրենքներում փոփոխություններ կատարելով», - ասաց պատգամավորը։

Հիշեցնենք, որ դրանից ավելի վաղ՝ մայիսի 29-ին, ԱԺ-ում «Իմ քայլը» խմբակցության ղեկավար Լիլիթ Մակունցը հայտարարել էր, որ վեթթինգի մասին նախագիծը գրեթե պատրաստ է և շուտով այն կներկայացվի հանրությանը: Ապա` դիմել էր ընդդիմադիր խմբակցություններին՝ կոչ անելով ներկայացնել առաջարկություններ և հավելելով, որ նախագծի քննարկումը սկսվել է ամիսների առաջ:

Սիսակ Գաբրիելյանը նկատեց, որ միգուցե վեթթինգի մասին օրենքի դեպքում սահմանադրության փոփոխության հետ խնդիր առաջանար և ավելի երկարաժամկետ կլիներ՝ ստեղծել վեթթինգի առանձին հանձնաժողով։ Նա ընդգծեց, որ իրենց համար նշանակություն չունի՝ դա կլինի վեթթինգի հանձնաժողով, թե ԲԴԽ, կարևորը բովանադակությունն է։

«Մեր նպատակը դատաիրավական բարեփոխումներ իրականացնելն է և դա իրագործում ենք։ Գուցե մեթոդներն են տարբեր, այսինքն, չլինի վեթթինգի մասին օրենք, այլ լինի գործող օրենքներով և սահմանադրական մարմինների միջոցով», - ավելացրեց «Իմ քայլը» խմբակցության պատգամավորը։

Անդրադառնալով ԲԴԽ անդամի ընտրությանը՝ պատգամավորը հստակ չկարողացավ ասել այն կթողնեն աշնանային նստաշրջանին, թե ոչ. «Այս պահին խմբակցության ղեկավարը, ինչպես նաև ԱԺ նախագահը գործուղման են ԱՄՆ-ում։ Մի քանի օրից կժամանեն և եթե հնարավոր լինի գուցե արտահերթ նիստի միջոցով անենք այդպես»։

Պատգամավորը, սակայն, ավելացրեց, որ եթե մեկ անդամի թափուր տեղը լրացնեն, միևնույն է, այն բուն գործընթացը, որն իրենց պատկերացմամբ պետք է ԲԴԽ-ն իրականացնի, չի կարող. «Այդ օրենքի նախագիծն ամենայն հավանականությամբ սեպտեմբերին կլինի խորհրդարանում», - ասաց պատգամավորը։

Աղբյուր` Փաստինֆո