Փաստ ինֆո

Եթե Վենետիկի հանձնաժողովի եզրակացությունից որոշ մարդիկ կամ որոշ ուժեր զարմացել են, ապա ես ավելի վաղ հայտարարել եմ, որ վարչապետի՝ դատարանները շրջափակելու հայտարարությունը հակասահմանադրական կոչ էր և Վենետիկի հանձնաժողովն անպայմանորեն անդրադառնալու է, - «Փաստինֆո»-ի հետ զրույցում ասաց «Բարգավաճ Հայաստան» խմբակցության պատգամավոր Նաիրա Զոհրաբյանը՝ անդրադառնալով Վենետիկի հանձնաժողովի փաստաթղթին․

«Փաստինֆո»-ի հարցին, արդյոք դատարանների արգելափակումն ամեն դեպքում քաղաքական ենթատեքստ էր պարունակում, պատգամավորը դրական պատասխան տվեց. «Միանշանակ դա քաղաքական ենթատեքստ ուներ։ Եթե Սահմանադրական դատարանի շուրջ ձևվորված այս թնջուկը շարունակվի մնալ և դրա լուծումը փորձեն գտնել քաղաքական դաշտում, ապա մենք ունենալու ենք բազմաթիվ նման հայտարարություններ միջազգային տարբեր կառույցներից», - ասաց Նաիրա Զոհրաբյանը։

«Փաստինֆո»-ն փորձեց հասկանալ՝ ինչպես է Նաիրա Զոհրաբյանը դիտարկում պարբերաբար կազմակերպվող բողոքի ակցիաների ժամանակ ակտիվիստների իրավունքների պաշտպանությունը. «Եթե իսկապես ապրում ենք նոր Հայաստանում, իսկ նոր Հայաստանի կարգախոսներից մեկն այն է, որ յուրաքանչյուր ոք ունի ազատորեն արտահայտելու իր տեսակետը, անցկացնելու հանրահավաքներ, եթե դրանք չեն հակասում ՀՀ սահմանադրությանը»։

Հարցին՝ արդյոք չեն խախտվում նրանց իրավունքները, պատգամավորն ընդգծեց, որ ԱԺ մարդու իրավունքների պաշտպանության հանձնաժողովն ակտիվ աշխատում է օմբուդսմենի գրասենյակի հետ և ահազանգերի դեպքում արագ փորձում են արձագանքել։

Աղբյուր` Փաստինֆո