Փաստ ինֆո

Կառավարությունը հավանություն տվեց հերթական միջինժամկետ ծախսերի ծրագրին։ Առաջին հայացքից այս փաստաթղթի անվանումը գուցե ոչինչ չի ասում։ Բայց այն կարևոր է հատկապես նրանով, որ հնարավորություն է տալիս պատկերացում կազմել, թե ինչ ակնկալիքներ կարող է ունենալ հասարակությունը առաջիկա երեք տարիներին։

Որպես այդպիսին, սա թերևս երկրորդ ծրագիրն է իշխանափոխությունից հետո։ Եթե նախորդը հաստատվեց Հայաստանում բավական բուռն քաղաքական պրոցեսների ընթացքում, երբ դեռ նոր էր տեղի ունեցել իշխանափոխությունը և կառավարությունը նույնիսկ չէր կողմնորոշվում իր անելիքներում, ապա այս անգամ կառավարությունը փաստաթղթի վրա աշխատելու համար բավարար ժամանակ ունեցել է։ Ուստի թվում էր, թե ծրագրում պետք է տեղ գտնեին այն սպասելիքները, որոնք ձևավորվել էին ինչպես իշխանափոխությունից առաջ, այնպես էլ դրան հաջորդող վերջին մեկ տարում։ Հատկապես, որ, այս ընթացքում հեղափոխական տեմպերով տնտեսություն զարգացնելու և հասարակության կյանքը բարելավելու խոստումների ու հայտարարությունների պակաս չի եղել։

Սակայն այն, ինչ ունենք առաջիկա երեք տարիների միջինժամկետ ծախսերի ծրագիր կոչված փաստաթղթով, բոլորովին էլ լավատեսության հիմքեր չի տալիս։ Կառավարության ակնկալիքները տնտեսական զարգացումների հետ կապված բավական զուսպ են։ Չկան հեղափոխական առաջընթացի հույսեր։ Առաջիկա երեք տարիների տնտեսական հատվածի սպասումները միջին տարեկան 5 տոկոս աճի սահմաններում են։ Այն էապես զիջում է նույնիսկ նախահեղափոխական շրջանին։

Հիշեցնենք, որ իշխանափոխությանը նախորդող տարում Հայաստանում արձանագրվեց 7,5 տոկոս տնտեսական աճ։ Այնինչ, արդեն անցած տարի տնտեսական աճի տեմպը նվազեց և կազմեց 5,2 տոկոս։ Այս տարվա ակնկալիքը ևս հեղափոխական չէ` ընդամենը 5,4 տոկոս։

Աճի նման տեմպերով դժվար է առաջիկայում Հայաստանում լուրջ զարգացումների հասնել։ Թերևս, պատահական չէ, որ այս ծրագիրը սոցիալական ոլորտում առաջընթացի մեծ հույսեր չի տալիս։ Հռչակված թավշյա հեղափոխությունից հասարակության ակնկալիքը կենսաթոշակների 10 տոկոս բարձրացումը չէր։

Մարդիկ արագ և կտրուկ բարելավումների հույսեր ունեին։ Ու դրանք օդից չէին վերցված։ Նման հույսեր հասարակության շրջանում ձևավորել էր թավշյա իշխանությունը։

Այսօր սակայն այդ ամենից ոչինչ չի մնացել։ Մի պահ թվում էր, թե դրա համար ժամանակ է պետք։ Ժամանակն անցնում է, իսկ արդյունքները տեսանելի չեն։ Եթե դրանք նույնիսկ կան, ապա շատ քիչ են։

Կյանքը ցույց տվեց, որ կառավարությունն ի վիճակի չէ արագ լուծումներ տալ այն խնդիրներին, որոնց համար ժամանակին այդքան բուռն մեղադրում էր նախորդներին։ Սոցիալական իրավիճակը Հայաստանում շարունակում է նույնքան ծանր լինել, որքան իշխանափոխությունից առաջ։ Կառավարությունը խոսում է կենսաթոշակների և առանձին ոլորտներում աշխատավարձերի 10 տոկոսանոց բարձրացումների մասին, բայց մոռանում է, որ երկիրը գտնվում է գնաճային բավական բուռն դրսևորումների նախաշեմին։ Դրանք արդեն իսկ զգացնել են տալիս, սակայն կխորանան հատկապես հաջորդ տարվա սկզբից։

Ու այսքանից հետո 10 տոկոսանոց այն բարձրացումները, որոնցով փորձ է արվում կերակրել հասարակությանը, ոչինչ չեն տալու։ Կյանքը Հայաստանում գնալով թանկանում է, իսկ մարդկանց եկամուտները դրան համարժեք չեն ավելանում։ Այն, ինչ կառավարությունն ակնկալում է առաջիկա երեք տարիներին, հեռու է հեղափոխական լինելուց։

Աղբյուր` Փաստինֆո