Փաստ ինֆո

«Ես շարունակում եմ մնալ այն կարծիքին, որ ԲԴԽ կազմը պետք է մի փոքր այլ մեխանիզմով ընտրվեր, պետք է հասարակությունը իմանար՝ ում մեջ է ընտրություն կատարվել, ինչ սկզբունքով»,- «Փաստինֆո»-ի հետ զրույցում այս կարծիքը հայտնեց փաստաբան Երվանդ Վարոսյանը՝ անդրադառնալով երեկ կայացած Դատավորների ընդհանուր ժողովին եւ ԲԴԽ անդամների ընտրությանը. «Այս պահի դրությամբ ես ունեմ զգացողություն, որ մենք նախկին Բարձրագույն դատական խորհրդից շատ հեռուն չենք գնալու, բայց թող ես սխալվեմ, եւ թող նրանք իրենց գործունեությամբ ժամանակի ընթացքում ցույց տան, որ դա այդպես չէ»,-ասաց նա։

Հիշեցնենք, որ երեկ ընտրվել է ԲԴԽ երկու անդամ, իսկ Վճռաբեկ դատարանի դատավոր Նախշուն Տավարացյանն էլ երդվել է ԲԴԽ անդամի կարգավիճակով։ Նշենք, որ նա ԲԴԽ անդամ էր ընտրվել դեռեւս ութ ամիս առաջ, սակայն ինքնաբացարկի միջնորդություն էր ներկայացրել, որը չէր հաստատվել։ Չէր կայացել նաեւ Տավարացյանի երդման արարողությունը։

«Փաստինֆո»-ի հետ զրույցում անդրադառնալով այս հանգամանքին՝ Երվանդ Վարոսյանն ասաց, որ այսօր Հայաստանում ինչ ասես, կարող է լինել. «Ուզել է՝ երդվել է, լավ է, որ գոնե որպես ԲԴԽ անդամ է երդվել, ոչ որպես այլ մարմնի անդամ»։ Վարոսյանի խոսքով՝ տեղի են ունենում իրադարձություններ, որոնք մեկնաբանելու կարիք առհասարակ չկա, եւ իրավական հիմնավորում գտնելն ուղղակի անհնար է. «Դատական օրենսգրքով հստակ սահմանված է, որ ընտրությունից անմիջապես հետո անձը պիտի երդվի, էլ ինչի՞ մասին է խոսքը»։

Հարցին՝ այդ պարագայում ինչո՞ւ են դատավորները մեծամասամբ, այսպես ասած, հանդուրժող վերաբերմունք դրսեւորել դրա նկատմամբ, Երվանդ Վարոսյանը պատասխանեց. «Ես ներկա չեմ եղել ժողովին, որպեսզի ասեմ՝ ով ինչպես արձագանքեց, բայց ես միշտ համոզված եմ եղել, որ մեր դատական համակարգը մեծամասամբ կազմված է եղել կոմպրոմիստներից, եւ փոքրամասամբ՝ սկզբունքային մարդկանցից, դա միշտ է այդպես եղել, ցավոք սրտի, առհասարակ ՀՀ-ում դատավոր դառնալու ուղին է այդպիսին եղել, եւ շատ դժվար է այդ ուղին անցնել՝ պահպանելով այն սկզբունքները, որ ունես»։

Երվանդ Վարոսյանի խոսքով՝ ընտրվածների մեջ կա անդամ, ում համար ինքն անձամբ ուրախ է. խոսքը Երեւանի ընդհանուր իրավասության դատարանի դատավոր Մեսրոպ Մակյանի մասին է. «Բայց միեւնույնն է, ժամանակի մեջ պարզ կդառնա, թե մենք ինչ ԲԴԽ ունենք, այն ինչ նպատակներ ունի իր առաջ, եւ ուր ենք մենք առհասարակ շարժվում։ Ինձ համար անհասկանալի երդումը չհաշված՝ մնացածը ժամանակը ցույց կտա, ու կտեսնենք, թե ինչ կփոխվի Բարձրագույն դատական խորհրդում, ինչ չի փոխվի, եւ նորընտիր անդամներն իրենց ինչպես կդրսեւորեն։ Եթե կարողանանք հասնել նրան, որ սկզբունքային մարդիկ մեծամասնություն կազմեն դատական համակարգում, մենք կունենանք նորմալ պետություն»։

Հարցին, թե  այս կազմով ԲԴԽ-ից, որպես վեթթինգ իրականացնող մարմին, ի՞նչ սպասելիքներ է պետք ունենալ (ԱԺ նախագահ Արարատ Միրզոյանը նշել էր, թե վեթթինգի որոշ գործիքակազմեր տրվելու են նաեւ ԲԴԽ-ին), Երվանդ Վարոսյանը պատասխանեց, որ իրեն հայտնի չէ, թե սահմանադրական ներկա կարգավորումներով դա ինչպես եւ ինչ գործիքակազմով պետք է լինի. «Եթե խոսքն այն գործիքակազմի մասին է, որը կար, ապա էլ ի՞նչ վեթթինգ, ԲԴԽ-ն այսպես թե այնպես իր գործառույթները պետք է իրականացնի։ Ինձ թվում է՝ վեթթինգն ավարտվել է, մնացել է վեթթինգի մասին խոսակցությունը։ Եվ քանի որ այդ  խոսակցությունները դաշտ են նետվել, բնականաբար իշխանությունները չեն կարող ասել՝ դե գիտեք ինչ, Արմեն Դանիելյանից հետո, մենք, այսպես ասած, վեթթինգի կարիք չունենք։ Դրա համար ինչ-որ մի բան պիտի անեն, հետո էլ հասարակությանը կհրամցնեն, կասեն՝ սա էլ վեթթինգն էր»,-մեզ հետ զրույցում ասաց փաստաբան Երվանդ Վարոսյանը։

Հեղինակ` Միլենա Խաչիկյան