Փաստ ինֆո

«Թափառող կենդանիների վնասազերծման կենտրոն» ՀՈԱԿ-ի տնօրենի՝ հրատապ հրավիրված ասուլիսում տրված պարզաբանումները Երևանի ավագանու «Լույս» խմբակցության Դավիթ Խաժակյանին չեն գոհացրել: «Փաստինֆո»-ի հետ զրույցում նա նշեց, որ այդ պատճառաբանություններն իրեն ապշեցրել են։

«Մեզ ասում են, գիտե՞ք նորմալ է, որ կարող են 5 շուն մի փոքր վանդակում պահվել, որովհետև մի օր են ընդամենը մնում: Նախ ասեմ, որ մի օր չեն մնում, ավելի շատ են մնում, դեպքեր կան, երբ որ արտաքին միջամտություն է եղել, որ ի վերջո բաց թողնեն այդ կենդանիներին: Հակասանիտարական վիճակում աշխատում է այդ հիմնարկի ողջ աշխատակազմը: Ապշելուն այն է, որ այդ հիմնարկի ղեկավարը նստած է Քաղաքապետարանի վարչական շենքի մի բարեկարգ կաբինետում և ասում է, որ նորմալ է, որ մենք կենդանիներին ժամանակավորապես կպահենք այդ պայմաններում, նորմալ է, որ մասնագետները, ովքեր աշխատում են այնտեղ , կաշխատեն այդ պայմաններում, բայց ինքը նստած է բարեկարգ սենյակում»,- ասաց Խաժակյանը:

Նա որևէ օբյեկտիվ խոչընդոտ չի տեսնում, որի պատճառով հնարավոր չէր լինի 5-6 ամսվա համար թեկուզ նորմալ պայմաններ ապահովել:
«Նվազագույն պայմաններ այնտեղ չկային, լինի դա ժամանակավոր, թե երկարաժամկետ, դա անընդունելի է»:

Հիշեցնենք՝ 3 օր առաջ Երևանի ավագանու «Լույս» խմբակցության անդամները անակնկալ այցելել էին «Թափառող կենդանիների վնասազերծման կենտրոն» ՀՈԱԿ-ի տարածք, որտեղ ստերջացում են շներին: Ուղիղ եթերում ցույց էին տալիս այնտեղ տիրող իրավիճակը: Սրանից հետո ՀՈԱԿ-ի տնօրեն Արմեն Բեգոյանը հրատապ ասուլիս հրավիրեց: Ասում էր՝ այդ վայրը ժամանակավոր է, ուղղակի Կենդանաբանական այգու սեզոնի բացման հետևանքով չեն կարողանում աշխատանքները շարունակել Կենդանաբանական այգուն կից անասնաբուժարանում: Արմեն Բեգոյանը նաև նշել էր , որ աշխատանքները դադարեցնել, հետաձգել չէին կարող, քանի որ շների թվաքանակը այդ ընթացքում կարող էր քառապատկվել:

Հեղինակ` Անահիտ Հովհաննիսյան