Փաստ ինֆո

Դատավորների բարեվարքության գնահատման կառուցակարգի մշակման համար աշխատանքային խումբ դեռ չի ստեղծվել: Փաստինֆո-ի հետ զրույցում այս մասին ասաց Արդարադատության նախարարի տեղակալ Տիգրան Խաչիկյանը: Նրա խոսքով՝ աշխատանքային խումբ կարող է և չձևավորվել .  «Աշխատանքային խմբի ձևաչափ պաշտոնապես կարող է և չլինել, բայց հիմա Արդարադատության նախարարությունը համապատասպան իրավասու մարմիների հետ աշխատում է կառուցակարգերը մշակելու և կատարելագործելու ուղղությամբ, կարևորը որ աշխատանքը փաստացի կատարվի»:

Փոխնախարարի խոսքով՝ հնարավոր է դատավորների բարեվարքության գնահատման կառուցակարգի մշակման ցանկացած ձևաչափում ներգրավված լինեն ցանկացած մասնագետներ՝ այդ թվում դատավորներ ու փաստաբաններ:

«Փաստինֆո»-ի հարցին, թե ՀՀ ԱԺ պետաիրավական հանձնաժողովից ովքեր են ներգրավված կառուցակարգի մշակման աշխատանքներին՝ Տիգրան Խաչիկյանը նշեց, թե կոնկրետ մարդիկ չկան, աշխատում են բոլորի հետ։

Մշակվում է դատավորների բարեվարքության գնահատման կառուցակարգ

«Այս պահին մենք ակտիվորեն աշխատում ենք չափանիշները կոնկրետացնելու ուղղությամբ, չկան այս պահին մարդիկ, ովքեր գործուղված են հատուկ այդ խնդրի համար, մենք աշխատում ենք բոլորի հետ, ովքեր այս հարցում մասնագիտացված են»,- ասաց փոխնախարարը։

Դատաիրավական համակարգի բարեփոխումների աշխատանքների մասին պատգամավորներն անտեղյակ են. արդարադատության նախարարությունը ստո՞ւմ է

Մինչդեռ, հիշեցնենք, որ հուլիսի 3-ին արդարադատության նախարարությունը պաշտոնապես տարածել էր հայտարարություն առ այն, թե «Դատաիրավական բարեփոխումների շրջանակում Արդարադատության նախարարության կողմից՝ Ազգային ժողովի Պետական-իրավական հարցերի մշտական հանձնաժողովի հետ համատեղ մշակվում է դատավորների բարեվարքության գնահատման կառուցակարգը...»։ ՀՀ ԱԺ պետաիրավական հարցերի մշտական հանձնաժողովի մի շարք անդամներ՝ թե ընդդիմադիր եւ թե իշխանական խմբակցությունը ներկայացնող պատգամավորները «Փաստինֆո»-ի հետ զրույցում նշել էին, որ տեղյակ չեն իրենց հանձնաժողովի և Արդարադատության նախարարության կողմից համատեղ իրականացվող աշխատանքների, դատավորների բարեվարքության գնահատման կառուցակարգի մշակման մասին:

Մեր այն դիտարկմանը, որ դատավորների ընդհանուր ժողովը հաստատել է «Դատավորների վարքագծի և էթիկայի կանոնները»՝ Տիգրան Խաչիկյանը նշեց, որ դրանք էլ վերանայման կարիք ունեն: Իսկ ո՞ր երկրների փորձի վրա է հիմնված լինելու Դատավորների բարեվարքության գնահատման կառուցակարգը. «Հաշվի է առնվելու Եվրոպական առաջատար երկրների փորձը: Այնպես չէ, որ կոնկրետ մի երկրի մոդել կա, դա վերցնում փոխառում ենք արհեստականորեն ՀՀ-ի համար: Մենք փոխառում ենք այն մոդելը կամ այն մոդելների համակցությունը ,որը որ կարող է առավելագույնս արդյունավետ լինել մեր երկրի համար»,- ասաց փոխնախարարն ու ավելացրեց, որ նախատեսված են համապատասխան ռազմավարություններ, որոնք պետք է ընդունվեն Կառավարության կողմից: Դատավորների բարեվարքության գնահատման կառուցակարգի հիմնական ռազմավարությունների ընդունումը նախատեսում են մինչև սեպտեմբեր:

Աղբյուր` Փաստինֆո