Փաստ ինֆո

Արդեն 13 օր է, ինչ Երեւանի ընդհանուր իրավասության ի դատարանը չի քննում ՀՀ երկրորդ նախագահ Ռոբերտ Քոչարյանի պաշտպանների ներկայացրած միջնորդությունը՝ գրավի դիմաց Քոչարյանի խափանման միջոց կալանքը փոխելու վերաբերյալ: Այս մասին այսօր տեղի ունեցած մամուլի ասուլիսում հայտարարել է ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը՝ կոչով դիմելով ՄԻՊ Արման Թաթոյանին՝ անհապաղ միջամտելու այս հարցին, քանի որ տեղի է ունենում բացահայտ ու կոպիտ խախտում:

Ըստ փաստաբանի՝ միջնորդությունը ներկայացրել են դեռեւս հունիսի 27-ին, սակայն առաջին ատյանի դատարանը պատճառաբանում է, որ չի կարող քննել մեր միջնորդությունը, քանի որ գործը գտնվում է Վերաքննիչում, իսկ Վերաքննիչը պատճառաբանում է, որ չի կարող գործն ուղարկել առաջին ատյանի դատարանին, քանի դեռ Վերաքննիչ դատարանի որոշման բողոքարկման ժամկետը չի լրացել:

«Վերաքննիչ քրեական դատարանի դատավոր Արմեն Դանիելյանն արել է և անում է ամեն ինչ, որպեսզի հնարավորինս շատ խախտի պարոն Քոչարյանի իրավունքները: Պետք չէ զարմանալ, որ պարոն Դանիելյանը գործը չի ուղարկում առաջին ատյանի դատարան, թեև դրանով կոպիտ խախտում է օրենքը, բայց սա այս գրծով պարոն Դանիելյանի կողմից օրենքը կոպիտ խախելու առաջին դեպքը չէ, սպասելի էր, որ իրենից կապված ամեն բան կանի, որպեսզի պարոն Քոչարյանի իրարվունքները հնարավորինս չափ շատ խախտվեն, դրա համար գործը Վերաքննիչ դատարանից չի ուղարկվում առաջին ատյանի դատարան»,- նշեց Հ.Ալումյանը։

Պաշտպանի խոսքով, այդ միջնորդությունը հենց հունիսի 28-ին պետք է քննվեր ու դրա վերաբերյալ արդեն պետք է որոշում կայացվեր։

«Գործը չուղարկելը, պահելը Վերաքննիչ դատարանում, առաջին ատյանի դատարանում էլ մեր միջնորդությունը չքննելը այն պատրվակով, որ գործը գտնվում է Վերաքննիչ դատարանում, սրանք բոլորը օրենքից չբխող պատրվակներ են, բոլորը պարոն Քոչարյանի իրավունքի խախտում են»,- ասաց Ռ. Քոչարյանի պաշտպանը։

Հ. Ալումյանը նշեց, որ այսօր լրանում է Վերաքննիչ քրեական դատարանի կայացրած վճիռը բողոքարկելու ժամանակը, և դատավորը գործը պետք է ուղարկի առաջին ատյանի դատարան։

Հիշեցնենք, որ Վերաքննիչ քրեական դատարանը՝ նախագահությամբ Արմեն Դանիելյանի, հունիսի 25-ին բավարարել էր մեղադրանքի կողմի բողոքները եւ բեկանել Երեւանի ընդհանուր իրավասության դատարանի մայիսի 18-ի եւ 20-ի որոշումները, որոնցից առաջինով փոխվել էր Ռոբերտ Քոչարյանի խափանման միջոցը, իսկ երկրորդով՝ կասեցվել քրեական գործի վարույթը ու դիմում ներկայացրել ՍԴ։

Նրանք բողոքարկել էին մայիսի 18-ի՝ Երևան քաղաքի ընդհանուր իրավասության դատարանի՝ ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորման որոշումը փոփոխելու և նույն դատարանի մայիսի 20-ի՝ քրեական գործի վարույթը կասեցնելու և Սահմանադրական դատարան դիմելու որոշումը:

Աղբյուր` Փաստինֆո