Փաստ ինֆո

Դատավորների բարեվարքության գնահատման կառուցակարգը նախ եւ առաջ պետք է քննարկվեր դատական համայնքի հետ: ‹‹Փաստինֆո››-ի հետ զրույցում նման կարծիք հայտնեց ԱԺ ԲՀԿ խմբակցության պատգամավոր, պետաիրավական հարցերի մշտական հանձնաժողովի անդամ Գեւորգ Պետրոսյանը:

‹‹Ընդհանրապես, եթե մի իրավական ակտ  վերաբերում է կոնկրետ բնագավառի, նախ եւ առաջ հենց այդ բնագավառի ներկայացուցիչները  պետք է ներգրավված լինեն  աշխատանքներում: Վերցնենք Քաղաքացիական դատավարության օրենսգիրքը, որն ընդամենը մեկ տարի է, ինչ ընդունվել է, բայց արդեն խնդիրներ կան, կամ Դատական օրենսգիրքը: Այդ խնդիրների պատճառներից մեկը հենց այն է, որ   դատավորներն ու դատական համակարգի աշխատողները ներգրավված չեն եղել այդ փոփոխությունների մշակմանը կամ նրանց կարծիքը հիմնականում հաշվի չի առնվել: Օրինակ, ինչո՞վ բացատրենք, որ այսօր մեկ դատավորին ընկած ծանրաբեռնվածությյունն  ավելին է , քան եղել է նախկինում, սա մեկ բան է նշանակում, դատավորները ներգրավված չեն եղել իրենց գործունեությունը կարգավորող  իրավական ակտերի ակունքներում, արդյունքն էլ սա է, հետեւաբար, ոչ մի երաշխիք չկա , որ այդ նույն ռիսկերը չենք ունենալու նաեւ այս դեպքում»,-ասաց պատգամավորը:

Ի դեպ, ԱԺ պետաիրավական հարցերի մշտական հանձնաժողովի անդամները շարունակում են անտեղյակ մնալ Դատավորների բարեվարքության գնահատման կառուցակարգի նախագծից, թեեւ ՀՀ արդարադատության նախարարությունը դեռ հուլիսի 3-ին հայտարարել էր, որ Դատաիրավական բարեփոխումների շրջանակում նախարարությունն Ազգային ժողովի պետաիրավական հարցերի մշտական հանձնաժողովի հետ համատեղ աշխատանքներ է իրականացնում, որի շրջանակում մշակվում է դատավորների բարեվարքության գնահատման կառուցակարգը:

‹‹Մեզ հետ նման նախագիծ չի քննարկվել, որեւէ անգամ խոսք չի եղել նույնիսկ նման նախագծի հավանականության մասին, ես չգիտեմ, թե նախարարությունն ինչն է հիմք ընդունել, բայց այս պահի դրությամբ մենք այդպիսի բան չենք ստացվել»,-շեշտեց Գեւորգ Պետրոսյանը:

Պատգամավորն անընդունելի է համարում պրակտիկան, երբ գործադիրը խոսում է գործընկերային հարաբերությունների մասին, բայց թաքցնում է այս կամ այն նախագիծը:

‹‹Ես այսօր էլ առիթ ունեցել եմ խոսելու օրենդրական նախաձեռնության ինստիտուտը պախկվոցու վերածելու մասին: Այս վարքագիծը ոչ ավել, ոչ պակաս կրկնում է նախկին իշխանությունների մոտեցումը: Նույն  կերպ վեթթինգի նախագծի մասին խոսեցին, մեկը հայտարարում է, որ 6 ամիս է, ինչ նախագիծը պատրաստ է, ԱԺ նախագահն ասում է՝ նման բան չկա: Հայտարարեցին, որ իբր Ստամբուլյան կոնվենցիան պետք է բերեն, դա էլ չկա: Չենք հասկանում , թե  ինչ են անում: Նախ եւ առաջ խորհրդարանի բարեվարքության կանոնն է պահանջում, որ  աշխատանքները տարվեն համագործակցելով ››,-ասաց Գեւորգ Պետրոսյանը՝ հավելելով, որ այսօր էլ օրինակ , առաջին անգամ է տեսել ՄԻԵԴ-ում ՀՀ ներկայացուցչի մասին օրենքի նախագիգծը, որը նույն օրը հանձնաժողովում  քննարկվելուց հետո մտավ ԱԺ լիագումար նիստի օրակարգ:

Պատգամավորի խոսքով, նմանօրինակ փաստերը վկայում են, որ գործող խորհրդարանը հեռու է կառավարությանը վերահսկող մարմին լինելուց, ավելին, առանձին դեպքում վերածվում է գործադիրի կցորդի:  

‹‹Այսօր Հայաստանում խորհրդարանական  վերահսկողության ինստիտուտը մնում է թղթին հանձնված բարի ցանկության մակարդակի վրա, խորհրդարանն այսօր ամենեւին չի ընկալում իրեն որպես կառավարության նկատմամբ հսկողություն իրականացնող  սուբյեկտ, ավելին, հակառակն է երեւում, որ շարունակում է մնալ կառավարության կցորդը, ինչի  ապացույցն այն է, որ հրատապ նախագծեր են բերում, որի մասին մենք 2 օր առաջ ենք լսել կամ նույն օրն է ենք լսում»:

Գեւորգ Պետրոսյանի հիշեցրեց՝ երբ վարչապետը դեռ ընդդիմադիր պատգամավոր էր, մշտապես խոսում էր այն մասին, որ իրավական ակտերը, որոնք հանրային հետաքրքություն են ներկայացնում, անպայման պետք է  հանրային իրազեկման փուլն անցնեն, հետո միայն մտնեն պաշտոնական շրջանառության մեջ:

Աղբյուր` Փաստինֆո