Փաստ ինֆո

«Փաստինֆո»-ի հաղորդմամբ՝ Երևանի ընդհանուր իրավասության դատարանի Կենտրոն և Նորք Մարաշ նստավայրում դատավոր Տաթևիկ Գրիգորյանի նախագահությամբ շարունակվում է կաշառքի մեջ մեղադրվող դատավոր Գագիկ Հեբոյանի և փաստաբան Վահագն Դանիելյանի գործով դատական նիստը։

Նշենք, որ այս պահին հրապարակվում է գործով առանցքային վկա Բենիկ Հարությունյանի նախաքննական ցուցմունքը, քանի որ ըստ պաշտպանների՝ դրանում եւ դատարանում տված ցուցմունքներում առկա է հակասություն։

Պաշտպան Արմեն Նադիրյանն ընթերցեց Բենիկ Հարությունյանի նախաքննական ցուցմունքը։

Ըստ այդ ցուցմունքի՝ Հարությունյանն ասել է, որ ինքն է իր կամքով դիմել իրավապահներին, եւ եթե ցանկանար կաշառք տալ, ապա անձամբ չէր դիմի իրավապահ մարմիններին․ «Ես վաղուց եմ ճանաչում Գագիկ Հեբոյանին, նա իմ հետ կապված բազում գործեր է քննել, մի քաղաքացիական հայցով ես, որպես հայցվոր, պետք է վճարեի պետտուրքի մի մասը, ես այդ գումարը չունեի։ Նրա վերաբերմունքից հասկացա, որ իմ հայցը մերժվելու է, եւ Գագիկ Հեբոյանին խնդրեցի, որ եթե հնարավոր է՝ ինձ ազատի պետտուրքի վճարումից։ Հեբոյանն ինձ ասաց, որ միջնորդության մեջ նշեմ, որ սոցիալական վիճակս լավ չէ, ներկայացնեմ բժշկական թղթեր, եւ այդ հիմքով ազատվեմ։ Ես այդպես էլ արեցի»։

Բենիկ Հարությունյանի խոսքով՝ ինքը հարցրել է դատավոր Գագիկ Հեբոյանին, թե իր լավությանն ինչպես վարձահատույց լինի․ «Ես ամենեւին նպատակ չունեի՝ կաշառք տալու, մտածում էի՝ չնչին ինչ-որ ձեւ, այդ թվում՝ ինչ-որ տեղ հաց ուտելու ձեւով, լավություն անեմ, նա էլ, ի զարմանս ինձ, ասաց, որ պետք է պետտուրքի 50 տոկոսը իրեն տամ, դա կազմում է 3500 ԱՄՆ դոլար, միայն այդ դեպքում նա ինձ պետտուրքից կազատի։ Ես ասացի, որ այդքան գումար չունեմ, խնդրեցի, որ մի քիչ իջնի, նա էլ իջավ մինչեւ 2500 ԱՄՆ դոլար»։

Վկայի խոսքով՝ այլ ճար չունենալով՝ ինքն ասել է՝ տեսնեմ, թե ինչ կարող եմ անել, եւ չնայած՝ Հեբոյանի մոտ տպավորություն ստեղծվեց, թե ինքը համաձայնել ,  բայց ինքը հավանություն չտվեց․ «Ես իմ մեջ գիտեի, որ այդ  գումարը տալ չեմ կարող, քանի որ երկրում իրավիճակ է փոխվել,  եւ օրենքը աշխատում է, իսկ Հեբոյանի պես մարդիկ մնացած համակարգի անունը գցում են, այդպես որոշեցի դիմել իրավապահ մարմիններին»։

Վկայի խոսքով՝ մինչեւ ԱԱԾ դիմելն ինքը գնացել է Եղվարդի դատարան եւ դատարանում տեղեկացել է, որ իր քաղհայցով վճիռը դեռ պատրաստ չէ․  «Հեբոյանն ինձ ասաց, որ պատրաստ կլինի հաջորդ օրը, եւ հարցրեց, թե երբ կլինի իր պահանջած գումարը, եւ քանի որ որոշել էի դիմել ԱԱԾ, ասացի, որ մոտ օրերս կլինի, նա էլ ասաց՝ աշխատեմ, որ այդ շաբաթվա մեջ լինի։ Հաջորդ օրը տեղեկացա, որ նա ինձ ազատել է պետտուրքից, բայց հենց այնպես չէր ազատի, ազատել է իր պահանջած գումարի դիմաց՝ հավատալով, որ ես այդ առաջարկին համաձայնել եմ։ Բացի այդ, ես նույն դատարանի այլ դատավորների մոտ այլ հայցեր ունեի, եւ եթե իր ուզածը չանեի՝ նա ազդեցություն կունենար այդ դատավորների վրա՝ ի վնաս ինձ, ոչ իմ օգտին վճիռներ կայացնելու»։

Վկան իր ցուցմունքում նշել է, որ մարտի 25-ին իրեն կանչել են ԱԱԾ՝ հաղորդում ու բացատրություն տալու, իսկ մինչ այդ գնացել է Եղվարդի դատարան՝ ժամանակ շահելու համար խնդրանքով դիմել դատավորին․ «Նա ծանր տարավ, ասաց, որ այդ հարցով իրեն այլեւս չանհանգսատցնեմ, եւ դա տամ հարեւանությամբ գործող փաստաբանական գրասենյակի փաստաբան Վահագն Դանիելյանին»։

Իր վրա տեսանկարահանող սարք դնելուց եւ հատուկ նյութով մշակված գումար ԱԱԾ-ից ստանալուց հետո վկան, իր ցուցմունքի համաձայն, գնացել է Վահագն Դանիելյանի գրասենյակ, որտեղ Դանիելյանը ներկա չի եղել․ «Կարգադրիչներն ասացին, որ գնամ Վահագի գրասենյակի երկրորդ հարկ, ես գնացի, մի փաստաբան կնոջ ասացի, որ Հեբոյանի պահանջով Վահագին պետք է 2500 ԱՄՆ դոլար տամ, նա հարցրեց՝ գուցե պետտուրքի մասնակի մարո՞ւմ է, ես էլ ասացի՝ չեմ կարծում, սակայն եթե այդպես է համարվում, ուրեմն՝ այդպես է։ Դրանից հետո այդ կինը ասաց, որ այդ գումարը թողնեմ Վահագի քարտուղարուհու մոտ, իսկ մինչ այդ Վահագը զանգել էր իր քարտուղարուհուն, ասել էր, որ հաջորդ օրը գամ։ Հաջորդ օրը նույն գումարով եւ հատուկ սարքավորումներով գնացի Վահագի մոտ»։

Ըստ վկայի ցուցմունքի՝ Վահագն Դանիելյանը սկզբում որեւէ բան չասաց, եւ իր գնահատմամբ՝ նա լարվեց․ «Անընդհատ դուրս էր նայում, այդ ժամանակ հասկացա, որ նա լավ տեղյակ է թեմայից, գիտի, որ իմ տված գումարը կաշառք է։ Միասին դուրս եկանք, եւ չորս կողմը նայելով՝ նա իմ ականջին ասաց, որ  այդ գումարը տանեմ, իր ավտոմեքենայի հետեւի ապակուց ներս գցեմ։ Ես այդպես էլ արեցի։ Նա, դա տեսնելով, մի կողմ հեռացավ։ Նա հաստատ իմացել է, որ դա կաշառք է․ եթե տեղյակ չլիներ, կհարցներ, թե ինչ գումար է կամ կզարմանար կամ դատավորից ճշտումներ կաներ, այլ ոչ թե վախեցած կողքերը կնայեր ու կասեր, որ ներս գցեմ»։

Ըստ  վկայի՝ այդ ամենը տեսանկարահանող սարքերով ֆիքսվել է։

Նշենք, որ հաջորդ հարցաքննության ժամանակ արդեն ՀՔԾ-ում Բենիկ Հարությունյանը հարցաքննվել է մեղադրյալի կարգավիճակով։ Նա չի ընդունել իրեն առաջադրված մեղադրանքը՝ պնդելով, որ իր նախաձեռնությամբ է դիմել իրավապահ մարմիններին, եւ հիշատակել է Քրեական օրենսգրքի այն հոդվածը, որով անձը ազատվում է պատասխանատվությունից, եթե այդ մասին հայտնում է նախաքննական մարմնին։ Վկան ասել է, որ մինչեւ մեղադրանքն իր վրայից չհանեն, ինքը հրաժարվում է այլեւս ցուցմուքն տալուց եւ որեւէ մեկի հետ առերես հարցաքննվելուց։

Պաշտպան Նադիրյանը հարց հղեց գործով վկա Բենիկ Հարությունյանին, թե ինքն ինչպես է մեկնաբանում այն հանգամանքը, որ նախորդ դատական նիստին վկան բացառել է, որ իր նախաձեռնությամբ է գումար առաջարկել, իսկ նախաքննական ցուցմունքում ասել է, որ ուզել է վարձահատույց լինել։ Սրան ի պատասխան վկան ասաց, որ գուցե մի բառ ավել է ասել վարձահատույց լինելու մասով, ինքը նկատի է ունեցել լավության տակից դուրս գալ․ «Իսկ լավության տակից դուրս գալը ես հասկացել եմ բարի կամքի դրսեւորում, սիմվոլիկ մի բան, դա կաշառք տալու առաջարկ չէ, մտածեցի՝ մի օր կհրավիրեմ թեթեւ հյուրասիրության, ջերմ-ջերմ կբաժանվենք իրարից»։

Հեղինակ` Միլենա Խաչիկյան