Փաստ ինֆո

«Փաստինֆո»-ի հաղորդմամբ՝ Երեւանի ընդհանուր իրավասության դատարանում դատավոր Մնացական Մարտիրոսյանի նախագահությամբ շարունակվում է  Մանվել Գրիգորյանի եւ նրա կնոջ՝ Նազիկ Ամիրյանի գործով դատական նիստը։

Մեղադրող կողմը, ծանոթանալով պաշտպանների միջնորդությանը, հայտարարեց, որ որեւէ դատավարական ընթացակարգ, ըստ որի՝ դատարանը պետք է վերանայի իր կողմից կայացված որոշումը, առկա չէ։ Դատախազ Վահե Դոլմազյանի խոսով՝ դա  բխում է միջնորդության բովանդակությունից․ «Իսկ եզրափակիչ մասում գրված «կից փասատթղթերի հիմքով քննարկել սույն միջնորդությունը եւ անհապաղ ազատ արձակել»-ը կամայական է հնչում»։

Վահե Դոլմազյանն ընդգծեց, որ ՀՀ քրեական դատավարության օրենսգրքի 102-րդ հոդվածի համապատասխան դրույթը սահմանում է, որ նույն փուլում նույն մարմնին միջնորդություն կարելի է ներկայացնել, եթե փաստական հանգամանքներ են փոխվել կամ վերացել են առկա hիմքերը․ «Որեւէ բան չի փոփոխվել, հետեւաբար այդ հիմքով սույն միջնորդությունը ենթակա է մերժման»,-նշեց նա։

Դոլմազյանի խոսքով՝ առողջական վիճակի հետ կապված գնահատական կարող է տալ միայն համապատասխան հանձնաժողովը․ «Ամեն անգամ դատական նիստերին նման միջնորդություն ներկայացնելիս պաշտպանական կողմը չարաշահում է միջնորդություն ներկայացնելու իրավունքը»,-նշեց դատախազը։

Նա նաեւ ընդգծեց, որ ըստ պաշտպանի՝ ստացվում է, որ ներկայումս մատուցվող բուժօգնությունը  այնքան էական չէ, որքան այդ դեղամիջոցը, որը ՀՀ-ում գրանցված չէ․ «Հիմա եթե պայմանականորեն փոխվի Մանվել Գրիգորյանի խափանման միջոցը, եւ նա դարձյալ շարունակի բուժում ստանալ «Նաիրի» բկ-ում, ինչպե՞ս եք այդ դեղամիջոցը տալու, մաքսանենգ ճանապարհո՞վ»։

Պաշտպան Լեւոն Բաղդասարյանը հայտնեց, որ թեեւ իրենք նախորդ նիստին էլ էին ներկայացրել խափանման միջոցն անհապաղ փոխելու միջնորդություն, որը մերժել էր, բայց ներկայացված փաստաթղթերին դատարանը չէր անդրադարձել։

Պաշտպան Արսեն Մկրտչյանն էլ ասաց, որ անցած դատական նիստին դատարանը փաստեց, որ Մանվել Գրիգորյանը ի վիճակի է գտնվել դատական նիստին, եւ միջնորդության մերժման հիմքերից մեկն էլ դա էր․ «Այսօր արդեն Մանվել Գրիգորյանը դատական նիստին ներկա չէ, եւ նրա առողջությունն էլ ավելի է վատթարանում։ Սա արեն բխում է անձի իրավունքների խախտում թույլ չտալուց»։

Նախագահող դատավոր Մնացական Մարտիրոսյանը հայտնեց, որ հեռանում է խորհրդակցական սենյակ՝ որոշում կայացնելու։ Այն կհրապարակվի 20 րոպեից։

Հիշեցնենք, որ այսօրվա դատական նիստին Գրիգորյանի պաշտպանները միջնորդել  էին անհապաղ փոխել նրա խափանման միջոց կալանավորումը։ Գրիգորյանը այսօրվա նիստին ներկա չէ։

Լուսանկարը՝ «Sputnik»-ի

Հեղինակ` Միլենա Խաչիկյան