Փաստ ինֆո

Նյու Յորք նահանգի Քուինս ամերիկյան բոռոյի (թաղամասի) բնակչուհին բժշկական սխալի պատճառով անծանոթ զույգի կենսաբանական նյութից երկվորյակներ է ծննդաբերել, հաղորդում է Lenta.ru- ն` հղում անելով The New York Post նորությունների պորտալին:

Ամուսնական զույգը, որը փաստաթղթերում նույնացվել է Յու.Զ.  և Ա.Պ. ինիցիալներով (Y.Z. և A.P.)՝ երկար ժամանակ երեխա ունենալու անհաջող փորձեր է կատարել: Անցյալ տարվա հունվարին նրանք դիմել են Ջոշուա Բերգերի (Joshua Berger) և Սայմոն Հոնգի (Simon Hong) CHA պտղաբերության կենտրոն, որը հայտնի է իր բարի համբավով էքստրակորպորալ բեղմնավորման ոլորտում:

Մեկ ամսվա ընթացքում ամուսինները անցել են անհրաժեշտ ընթացակարգերը, ստացել դեղամիջոցներ և, արդյունքում, փոխպատվաստման համար ունեցել են ութ սաղմ:  Խորհրդատվության, դեղորայքի և դեպի Լոս Անջելես ուղևորությունների համար, որտեղ գտնվում էր կլինիկան, նրանք ծախսել են մոտ 100 հազար դոլար: Նույն տարվա հուլիսին Ա.Պ. ենթարկվել է արհեստական բեղմնավորման, սակայն փորձը չի տվել ցանկալի արդյունք:

Մեկ ամիս անց բժիշկները օգտագործել են փոխպատվաստման համար կանացի երկու էմբրիոններ և սեպտեմբերին կինն արդեն հղիացել է: Հետագայում, ուլտրաձայնային հետազոտումը ցույց է տվել, որ նա սպասում էր երկու տղա երեխայի: Անհանգստացած հիվանդը դիմել է CHA Fertility Center խորհրդատվության համար: Բերգերը և Հոնգը ուսումնասիրել են հետազոտության արդյունքները և եզրակացրել, որ սարքը և մասնագետները կարող էին սխալվել:

Կինը 2019 թ-ի մարտի 31-ին կեսարյան հատման միջոցով ունեցել է երկու տղա երեխա: Երկու երեխաներն էլ արտաքինից տարբերվել են ասիական ծագումով ծնողներից: Հետագայում թեստերը հաստատել են, որ երեխաներն իրենց հարազատ չեն: Բացի այդ, պարզվել է, որ երկու տղաները իրար հետ ևս գենետիկորեն կապված չեն:

Յու.Զ. և Ա.Պ. ստիպված էին երեխաներին տալ իրենց կենսաբանական ծնողներին, ովքեր նույնպես հանդիսանում էին CHA Fertility Center  կլինիկայի հիվանդները: Ամուսինները հայց են ներկայացրել դատարան: Նրանք հայտնել են, որ երկար ժամանակ չեն կարողացել կիսվել հարազատների և ընկերների հետ տեղի ունեցածի մասին, քանի որ իրենք լուրջ հոգեբանական ցնցում են ապրել:

Աղբյուր` Փաստինֆո