Փաստ ինֆո

Ծառուկյանը բարեկրթության խիստ պակաս ունի։ Դա փողով չի գնվում։ Այս մասին ֆեյսբուքյան իր էջում գրել է Խոսքի ազատության պաշտպանության կոմիտեի նախագահ Աշոտ Մելիքյանը։

Վերջինս անդրադարձել է «Բարգավաճ Հայաստան» խմբակցության ղեկավար Գագիկ Ծառուկյանին, ով այսօր ճեպազրույցի ժամանակ հայտարարել է, որ չի պատրաստվում ներողություն խնդրել լրագրողներից իր ՝ «Հենց դու քո ցեղով գնա օրենքին ենթարկվի» արտահայտության համար։

Հիշեցնենք, որ մի շարք լրագրողական կազմակերպություններ հայտարարություն էին տարածել՝ Ծառուկյանից պահանջելով ներողություն խնդրել, որին ի պատասխան այսօր Գագիկ Ծառուկյանը ծիծաղեց և ասաց, որ չի ցանկանում որևէ մեկին վիրավորել։

Խոսքի ազատության պաշտպանության կոմիտեի նախագահ Աշոտ Մելիքյանն իր ֆեյսբուքյան գրառման միջոցով  լրագրողական գործունեություն ծավալած ԱԺ պատգամավորներին հորդորել է խորհրդարանում պաշտոնապես նախաձեռնել խնդրի քննարկումը։

Գրառման մեջ մասնավորապես ասված է.

«Եվ այսպես՝ Գագիկ Ծառուկյանը չի պատրաստվում ներողություն խնդրել լրագրողներից, որոնց վիրավորել է։ Զարմանալի չէ։ Հակառակը՝ զարմանալի կլիներ, եթե նա ընդուներ իր սխալը ու ներողություն խնդրեր։ Դրա համար բարեկրթություն է պետք, ինչի խիստ պակաս ունի Ծառուկյանը։ Դա փողով չի գնվում։ Նա նույնիսկ չի էլ պատկերացնում, որ լրագրողի հետ «դու»-ով ու «աղջիկ ջան»-ով խոսելն անթույլատրելի է, և դրա համար էլ է պետք ներողություն խնդրել։ Ու քանի որ Ծառուկյանն այս ամենը չի ուզում ընդունել, կոչ եմ անում պատգամավոր գործընկերներիս՝ Հայկ Գևորգյանին, Վահագն Հովակիմյանին, Գայանե Աբրահամյանին, Վահագն Թևոսյանին, Սիսակ Գաբրիելյանին, Թագուհի Թովմասյանին և մյուսներին, որոնք չեն մոռացել իրենց լրագրողական անցյալը, խորհրդարանում պաշտոնապես նախաձեռնել այս խնդրի քննարկումը՝ պատգամավորական էթիկայի տեսանկյունից և տեղեկացնել հանրությանը եզրակացության մասին», - գրել է Աշոտ Մելիքյանը։

ԱԺ «Իմ քայլը» խմբակցության պատգամավոր Գայանե Աբրահամյանն էլ նկատել է, որ ավելի համակարգային ու մշտական լուծման անհրաժեշտություն է տեսնում էթիկայի հանձնաժողովը մշտական գործող դարձնելը.

«Այդ դեպքում նմանատիպ հարցերն այսքան երկար ու դժվար բարձրաձայնելու անհրաժեշտություն չէինք ունենա», - գրել է պատգամավորը։

Աղբյուր` Փաստինֆո