Փաստ ինֆո

Բարձրաստիճան պաշտոնատար անձանց էթիկայի հանձնաժողովը երեկ՝ հուլիսի 9-ին, վարույթ է հարուցել Պետական վերահսկողական ծառայության պետի ժամանակավոր պաշտոնակատար Արգիշտի Քյարամյանի նկատմամբ։ Տեղեկությունը «Փաստինֆո»-ի հետ զրույցում հաստատեց Էթիկայի հանձնաժողովի անդամ Էդգար Շաթիրյանը։

Վերջինիս խոսքով՝ վարույթը հարուցվել է Վարչական իրավախախտումների մասին օրենսգրքի 169.28-րդ հոդվածի 5-րդ մասի առերեւույթ հատկանիշներով, այն է՝ հայտարարատուի կողմից հայտարարագրում անզգուշությամբ ոչ ամբողջական տվյալ ներկայացնելը։

Էդգար Շաթիրյանը մեզ հետ զրույցում նշեց, որ վարույթը հարուցվել է «Փաստերի ստուգման հարթակ»-ի հրապարակման փաստերի ստուգման արդյունքներով. «Պարոն Քյարամյանը, հանդիսանալով Հանրային ծառայության  մասին օրենքով հայտարարատու պաշտոնատար անձ,  իր 2019 թվականին պաշտոնը դադարեցնելու եւ նույն թվականին պաշտոնը ստանձնելու հայտարարագրում որոշ տվյալներ է լրացրել անշարժ գույքի առկայության վերաբերյալ, սակայն չի նշել մեկ միավոր անշարժ գույքի վերաբերյալ տվյալներ, որոնք, համաձայն Անշարժ գույքի կադաստրի կոմիտեի ընդհանուր գրանցամատյանի տվյալների, իրեն են պատկանում համատեղ սեփականության իրավունքով։ Համադրելով հայտարարագրված եւ էլեկտրոնային բազայում առկա տվյալները եւ վերհանելով առերեւույթ անհամապասխանությունը՝ հարուցել է վարչական վարույթ»,-հայտնեց Էդգար Շաթիրյանը։

Նշենք, որ վարչական իրավախախտումների հիշյալ հոդվածը պատժվում է տուգանքով՝ սահմանված նվազագույն աշխատավարձի երկուհարյուրապատիկից չորսհարյուրապատիկի չափով:

Հեղինակ` Միլենա Խաչիկյան