Փաստ ինֆո

Երևանի ավագանու «Լույս» խմբակցության անդամների ուղիղ եթերում տված բացատրությունները իրականության հետ ոչ մի աղերս չունեն: Այս մասին հայտարարեց «Թափառող կենդանիների վնասազերծման կենտրոն» ՀՈԱԿ տնօրեն Արմեն Բեգոյանը, որը հրատապ ասուլիս էր հրավիրել:

Ասում է՝ ավագանու անդամները առանց տեղեկացնելու և թույլտվության են Ագրարային համալսարանի Անասնաբուժական ֆակուլտետի վիրահատարան այցելել: ՀՈԱԿ-ի տնօրենն ասաց, որ ասուլիս նախատեսում էր անցկացնել մի քանի օր ուշ՝ լավ լուր հայտնելու. փետրվարից արդեն 1000 շուն են ստերջացրել։

Ասում է՝ սա աննախադեպ է:

Քաղաքապետարանի բնապահպանության վարչության պետ Խաչիկ Հակոբյանի խոսքով՝ փետրվարից, երբ «Թափառող կենդանիների վնասազերծման կենտրոն» ՀՈԱԿ-ը ստեղծվեց, վիրահատությունները անցկացվում էին Երևանի կենդանաբանական այգուն կից գործող անասնաբուժարանում: Պայմանավորված Կենդանաբանական այգու բացմամբ ապրիլի 15-ից աշխատանքները ժամանակավոր տեղափոխել են Ագրարային համալսարան.

«Մենք օգտագործել ենք եղած հնարավորությունները, այս պահին միակ գործող հնարավորությունը: Ագրարային համալսարանը անվճար տրամադրել է մեզ այդ տարածքը, անասնաբուժական ֆակուլտետի կլինիկական մասնաշենքի վիրահատարաններն են եղել: Շնորհակալ ենք , շարունակելու ենք այնտեղ աշխատել, մինչև մեր սեփական կլինիկան կկառուցվի, կկահավորվի և կկարողանանք տեղափոխվել»:

ՀՈԱԿ տնօրեն Արմեն Բեգոյանի խոսքով՝ ավագանու անդամները ցեխ են ուզում շպրտել իրենց աշխատակիցների եւ քաղաքապետարանի վրա
«Այո, ՀՈԱԿ-ի պայմաններն անբավարար են, բավարար չեն, բայց ելնելով հրատապությունից սկսեցինք աշխատել այդ պայմաններում Պետք է ոչ թե ցեխ շպրտել՝  այլ շնորհակալություն հայտնել, նման պայմաններում աննախադեպ քանակի աշխատանք ենք կատարել: Համաճարակի խնդիր է լուծվում, գլխաքանակի կանոնակարգման հարց ենք լուծում: Մի պահ պատկերացնենք, որ մենք դեռ սպասում ենք շինարարությանը և այդ 1000 կենդանի, որ ստերջացվել են, ունեցել են սերունդ:

Եղածից 4000 հազարով ավելի շուն կունենայինք»:

Արմեն Բեգոյանն նաև նշեց, որ ,այո, վանդակներում 2-3 կենդանի է լինում, բայց վանդակները բավականին մեծ են, վիրահատությունից հետո առանձին վանդակներում են լինում:

Աղբյուր` Փաստինֆո