Փաստ ինֆո

Մետաղական ջարդոնի արտահանման պետտուրքի սահմանումը ԱԺ տնտեսական հանձնաժողովի այսօրվա նիստի օրակարգում էր: Հանձնաժողովի նախագահը նշեց, որ հարցն ուսումնասիրել են, գնիջեցում հնարավոր է.

«80 դրամ պետտուրքը սահմանվել է 2012-ին: Այդ ժամանակից շատ բան է փոխվել: Մենք մի քիչ գումարում- հանում արեցինք , համադրեցինք այստեղի ու դրսի գները և համարում ենք, որ գները կարող են իջնել՝ 80-ից դառնալով 60 դրամ: 6 0դրամն էլ կարող է զսպող լինել»:

Հարկային օրենսգրքի փոփոխություների փաթեթով նախատեսվող մետաղական ջարդոնների պետական տուրքը Բաբկեն Թունյանն առաջարկում է միանգամից ուժի մեջ չմտցնել, ողջամիտ ժամկետ տալ արտահանողին, քանի որ, նրա խոսքով, նրանք օրենք չեն խախտել.
«Չնայած դեռ անցած տարվա դեկտեմբերից իմացել էին, որ նման փոփոխություն է նախատեսվում, պետք է այդ ռիսկը հաշվարկած լինեին, բայց արտահանողները պայմանագրային պարտավորություններ ունեն, որոնք պետք է կատարեն: Դրա համար առաջարկում եմ նրանց ևս 2 ամիս ժամանակ տալ»:

Բաբկեն Թունյանն ասում է՝ տեղի արտադրողի հետ էլ են խոսել, պարտավորվել են 40 դրամով ընդունել մետաղական ջարդոնը, անհրաժեշտության դեպքում հրապարակային հայտարարությամբ էլ հանդես կգան:

Արտահանվող մետաղական թափոնների համար պետտուրք նախատեսված է եղել դեռ 2012-ից: Օրենքը, սակայն, ըստ Բաբկեն Թունյանի, արտոնություն է ունեցել, որից և օգտվել են արտահանողները.

«Պետտուրքից ազատված են եղել միայն հայկական ծագման մետաղական թափոնները, «հայկական ծագման», այսինքն՝ տվյալ ապրանքը մաշվել է Հայաստանում: Մի շարք ընկերություններ մետաղի ջարդոնի համար ծագման երկրի սերտիֆիկատ են ձեռք բերել և արտահանել են, սկզբում քիչ քանակությամբ, իսկ անցած տարվա մայիսին, օրինակ՝ 3700 տոննա մետաղական թափոն են արտահանել, եթե այս տեմպերով շարունակվի, մեր տեղի գործարանները հումք չեն ունենա աշխատելու»:

Հեղինակ` Անահիտ Հովհաննիսյան