Փաստ ինֆո

Ազգային անվտանգության խորհրդի նախկին քարտուղար, նախկին փոխվարչապետ, նախագահի աշխատակազմի նախկին ղեկավար Արմեն Գևորգյանի ամբողջ գույքի վրա դրված կալանքը վերացնելու միջնորդության վերաբերյալ դատարանի գրության դեմ պաշտպանական կողմի բողոքը հուլիսի 4-ին մակագրվել է դատավոր Տիգրան Սահակյանին։ Այս մասին «Փաստինֆո»-ն տեղեկացավ դատական-տեղեկատվական համակարգից։

Ավելի վաղ հայտնել ենք, որ պաշտպան Էրիկ Ալեքսանյանը գործի կասեցման փուլում միջնորդել էր վարույթն իրականացնող դատարանին՝ խնդրելով քննարկել Գեւորգյանի ամբողջ գույքի վրա դրված կալանքը վերացնելու հարցը, եւ հունիսի 21-ին դատարանից ստացվել էր գրություն, ըստ որի՝ պաշտպանական կողմի այդ միջնորդությունը կքննարկվի գործը վերսկսելուց հետո, քանի որ կասեցման փուլում դատավարական որեւէ գործողություն կատարելու իրավասություն չունի։ Դատարանի այս գրությունը պաշտպանական կողմը դիտարկել է որպես մերժման որոշում, որով խախտվել է Գեւորգյանի՝ Սահմանադրությամբ եւ Եվրոպական Կոնվենցիայով երաշխավորված սեփականության իրավունքը։

Հիշեցնենք, որ Արմեն Գեւորգյանի գույքի վրա կալանք է դրվել Մարտի 1-ի գործով քննչական խմբի ղեկավար Հրաչ Մուշեղյանի կողմից դեռեւս 2018 թվականի օգոստոսի 21-ին։ Նա մեղադրվում է ՀՀ քրեական օրենսգրքի 38-300.1-րդ հոդվածի 1-ին մասով, 311-րդ հոդվածի 4-րդ մասի 2-րդ կետով եւ 190-րդ հոդվածի 3-րդ մասի 1-ին կետով` ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու եւ հանցավոր ճանապարհով ստացված գույքն օրինականացնելու մեջ:

Հեղինակ` Միլենա Խաչիկյան