Փաստ ինֆո

Երևան քաղաքի ընդհանուր իրավասության դատարանում` հուլիսի 8-ին շարունակվեց ճանապարհային ոստիկանության երկու աշխատակիցների մահվան մեջ մեղադրվող «Ճըվճըվ Արոյի» որդու՝ Սարգիս Վարդանյանի, գործով դատական նիստը՝ դատավոր Հարություն Մանուկյանի նախագահությամբ։

Դատարանում ներկայումս վկաների հարցաքննության փուլն է։

Դատական նիստին նախատեսվում էր գործով վկա՝Աշոտ Բաղդասարյանի ներկայությամբ դատարանում հետազոտել դեպքի վայրի զննության տեսագրությունը, սակայն տուժողի իրավահաջորդի ներկայացուցիչ Ռուբեն Բալոյանը միջնորդեց դատարանին,` հնարավորություն տալ հարցաքննել  վկային։

Դատարանի թույլտվությամբ` տուժողի իրավահաջորդի ներկայացուցիչը հնչեցրեց իր հարցերը, սակայն նմանատիպ հարցերի կրկնության պատճառով գործով վկան բորբոքվեց և դիմելով դատարանին ասաց․ «Այս մարդը հոգեբանական ճնշում է գործադրում իմ վրա։ Ես չգիտեմ կախվեմ, որ էլ էս գործով դատարան չգամ,-ասաց գործով վկան։ Դատարանը նկատողություն արեց վկային ասելով ` զսպեք ձեր էմոցիաները, սակայն ի պատասխան դատարանի կողմից իրեն արված նկատողության` վկան ասաց, որ «ներվերըայլևս չի բավարարում»։

Տուժողի իրաահաջորդը շարունակեց հնչեցնել իր հարցերը: Վերջինիս՝այն հարցին թե, որտեղ է արգելակել ամբաստանյալը,վկան պատասխանեց․
«Ես նորից եմ ասում, իմ ավտոմեքենայի հետևից լսել եմ ամբաստանյալի վարած ավտոմեքենայի արգելակման ճռռոցը: Էդ մարդը արգելակած է ընթացել դեպի խաչմերուկ և բախումը եղել է արգելակած վիճակում»,- պատասխանեց վկան:

Ռ. Բալոյանի այն հարցին, թե ամբաստանյալի վարած ավտոմեքենան ինչ արագությամբ էր ընթանում դեպի խաչմերուկ, վկան պատասխանեց, որ չի կարող ո՛չ մետրեր ասել, ո՛չ էլ արագություն և պահանջեց դատարանում հրապարակել  գործի նախաքննության ժամանակ իր տված ցուցմունքն ամբողջությամբ, որը հրապարակելուց անմիջապես հետո ասաց, որ պնդում է իր նախաքննական ցուցմունքն ամբողջությամբ:

Վկայի հարցաքննությունն ավարտելուց հետո մեղադրող դատախազ Ա. Մարգարայանը հրաժարվեց իր ներկայացրած միջնորդությունից, պատճառաբանելով, որ վկան ընդունել է քրեական գործի նախաքննության ժամանակ իր տված ցուցմունքը, ուստի այլևս անհրաժեշտություն չկա վկայի ներկայությամբ զննության տեսագրությունները հրապարակել:

Նշենք նաև, որ քրեական գործում առկա բոլոր նյութերը` դատավարության կողմերի համաձայնությամբ համարվել էր դատարանում հետազոտված և հրապարակված, սակայն գործով վկա՝Աշոտ Բաղդասարյանի նախաքննական և դատարանում տված ցուցմունքի միջև առկա հակասությունների պատճառով դատարանը նախորդ նիստին որոշել էրդատարանում հրապարակել դեպքի վայրի զննության տեսագրությունը:

Դատական նիստին հարցաքննության համար ներկայացել էին նաև գործով վկաներ՝ Սուրեն Մկրտչյանը և Արմանուշ Շահմուրադյանը, սակայն աշխատանքային օրվա ավարտի պատճառով դատական նիստը հետաձգվեց: Հաջորդ դատական նիստը նշանակվեց օգոստոսի 14-ին, որի ժամանակ նախատեսվում է շարունակել վկաների  հարցաքննությունը:

Հիշեցնենք, որ ողբերգական դեպքը տեղի է ունեցել շուրջ 1,5 տարի առաջ. 2018թ. հունվարի 8-ին՝ ժամը 04:40-ի սահմաններում, Երևան քաղաքի Սայաթ-Նովա պողոտայի և Աբովյան փողոցի խաչմերուկում բախվել են «ԲՄՎX6» մակնիշի, 35 NT 388 համարանիշի և ճանապարհային ոստիկանության «Տոյոտա» մակնիշի, 243 II 02 հաշվառման համարանիշի ավտոմեքենաները, ինչից հետո «ԲՄՎX6» մակնիշի ավտոմեքենան դուրս է եկել երթևեկելի գոտուց և հարվածել գովազդային վահանակին: Ավտովթարի հետևանքով «Տոյոտա» մակնիշի, 243 II 02 համարանիշի ավտոմեքենայի վարորդ, ՃՈ 1-ին գումարտակի 6-րդ դասակի տեսուչ, ոստիկանության ավագ լեյտենանտ Ա.Դավթյանը և ուղևոր, ոստիկանության լեյտենանտ Խ.Գասպարյանն ստացած մարմնական վնասվածքներից մահացել են։

Պարզվել է, որ «ԲՄՎX6» մակնիշի ավտոմեքենայի ղեկին եղել է «Ճըվճըվ Արոյի» որդին՝ Սարգիս Վարդանյանը, որը թողնելով ճանապարհատրանսպորտային պատահարի վայրը, հեռացել է:

Նախնական քննության տվյալներով՝ Ս.Վարդանյանը Սայաթ-Նովա պողոտայի ուղղությամբ ընթացել է լապտերը միացված վիճակում՝ բնակավայրերի համար սահմանված թույլատրելի առավելագույն 60 կմ/ժ-ը գերազանցող արագությամբ և դրանով իսկ ստեղծել վթարային իրադրություն։
Մինչդատական վարույթում ձեռք բերված բավարար ապացույցների հիման վրա՝ Ս.Վարդանյանին մեղադրանք է առաջադրվել՝ ՀՀ քրեական օրենսգրքի 242-րդ հոդվածի 3-րդ մասի և 244-րդ հոդվածի հատկանիշներով։ Նրա նկատմամբ որպես խափանման միջոց է ընտրվել կալանավորումը:

Քրեական գործը դատարան է ուղարկվել դեռեւս 2018 թվականի հունիսին, սակայն դատավարությունը դեռ շարունակվում է։

Հեղինակ` Մերի Մնոյան