Փաստ ինֆո

«Երթեւեկության կարգավորումը պետք է լինի մարդակենտրոն, եւ արագության նվազեցումը չի կարող հանգեցնել խցանումների որեւէ քաղաքում»,- ասում է Ճանապարհային անվտանգության միջազգային փորձագետ Փոլ Դիսնեյը։ Նրա հետ զրուցել ենք Երեւանում երթեւեկության կարգավորման՝ մասնավորապես, թույլատրելի արագությունը 60-ից մինչեւ 50 նվազեցնելու եւ օրերս բուռն քննարկումների տեղիք տված այլ հարցերի շուրջ։

Դիսնեյն ընդգծեց, որ Մեծ Բրիտանիայում վաղուց արդեն բնակավայրերում երթեւեկության թույլատրելի առավելագույն արագությունը 50-ն է, որոշ տեղերում այն անգամ նվազեցվել է մինչեւ 20-30: Ընդ որում, ըստ նրա, ուսումնասիրությունները ցույց են տալիս, որ անգամ այդ արագության միջակայքում զոհերի եւ վիրավորների թիվը մեծանում է եւ զգալի է։ Դիսնեյը շեշտում է, արագության նվազեցումը ոչ մի կերպ չի կարող ազդել խցանումների ավելացման վրա, քանի որ խցանումների հիմնական պատճառը խաչմերուկն են։ Խցանումներից խուսափելու համար պետք է լույսացույցներով հստակ կարգավորել երթեւկությունը խաչմերուկներում, եւ ողջ քաղաքում ապահովել կայուն, կանոնավորված արագություն, որը կարող է լինել 20 կամ 60, ու ոչ մի դեպքում խցանում չի առաջանա։  

Ճանապարհային անվտանգության փորձագետի խոսքով, բազմաթիվ քննարկումներից հետո Լոնդոնում մասնագետները հանգեցին նրան, որ երթեւեկության կարգավորումը պետք է լինի մարդակենտրոն։ Եվ սա վերաբերում է ոչ միայն արագության կարգավորմանը, այլեւ հետիոտնի անվտանգ տեղաշարժին։ Ի պատասխան մեր հարցի, որ Երեւանում այժմ նկատվում է մի միտում՝ ծանրաբեռնված փողոցներում հետիոտնի անվտանգության ապահովման համար կառուցել վերգետնյա անցումներ, Փոլ Դիսնեյը պատասխանեց, դա հակասում է  մարդակենտրոն մոտեցմանը, քանի որ վերգետնյա կամ ստորգետնյա անցումներ կառուցելով՝ հաշվի չեն առնվում ծերերի, կանանց, հաշմանդամություն ունեցող անձանց խնդիրները։ Հետիոտնի կարիքներին պետք է վերաբերվել հարգանքով եւ բոլոր կարգավորումները կատարել ըստ այդմ՝ հաշվի առնելով բոլոր մարդկանց կարիքները։

Ճանապարհային անվտանգության միջազգային փորձագետ Փոլ Դիսնեյն այս օրերին Հայաստանում է գտնվում «Անվտանգ քաղաքներ․Գյումրի» ծրագրի շրջանակում, որն իրականացնում է «Ճանապարհային անվտանգության ազգային խորհուրդ»(ՃԱԱԽ) ՀԿ-ն՝ բրիտանական EASST կազմակերպության հետ՝ ՎԶԵԲ-ի ֆինանսավորմամբ։ Դրա շրջանակում հուլիսի 3-4-ը վերապատրաստվեցին Գյումրու ճանապարհների վերանորոգմամբ այժմ զբաղվող մի խումբ ինժեներներ։

Լ.Գալստյան

Աղբյուր` Փաստինֆո