Փաստ ինֆո

Երբ երկիրը նստած է գրանտների վրա և հանուն դրա իշխանությունները պատրաստ են զոհաբերել մեր  պետության հիմքը հանդիսացող  ամենաառողջ բջիջը՝ հայ ընտանիքը, թշնամին անելիք չունի, քանզի երկիրը ներսից խարխլողների պակաս չունենք:

Երբ իշխանության բարձր օղակներում պաշտոնավարում են անձինք, ովքեր առանց սահմանների պետություն են երազում՝ Արցախի հիմնահարց ունենալու պարագայում, ովքեր սեփական երկրի և ազգի անվտանգությունը շարունակաբար ստորադասում են հանուն   ինչ-որ անհասկանալի և կասկածելի իրավունքների, անհնար է չմտածել, որ մեր ազգային ինքնության հիմքերը  ներսից քանդելու ծրագիր է իրականացվում:

Երբ Հայաստանի կառավարությունը, Ազգային Ժողովի մեծամասնությունը միասեռական ամուսնությունները,  տրանսգենդերիզմը մեր երկրում  օրինականացնելու  հարցը օրախնդիր են համարում, պիտի կարողանան բացատրել հանրությանը, թե ինչու՞ է այն մերժելի ասենք, Բելոռուսի, Ռուսաստանի, Բուլղարիայի, Սլովակիայի, Լատվիայի, Ադրբեջանի, Չեխիայի և բազմաթիվ այլ երկրների համար, իսկ մեզ համար հրատապ ու կարևոր:

Այդ հրատապությունը  մարդու իրավունքների փաթեթավորմամբ  ներկայացնելու ցանկացած փորձ Հայաստանում  պիտի դատապարտվի և մերժվի, քանզի այն  խարխլում է մեր պետության հիմքերը՝ ընտանիքը, բանակը, ամենայն ազգայինը՝ մեր հոգևոր և մշակութային արժեքները:

Մեզ ոչ ոք հակառակը չի կարող պարտադրել: Եթե ԼԳԲՏ համայնքի հանդեպ իր վերաբերմունքն արտահայտելով ՌԴ նախագահ Վլադիմիր Պուտինը հստակ  ասում է՝ «Մենք ոչ մեկի դեմ չենք, մենք մեզ ենք պաշտպանում», եթե Բելառուսի նախագահ Ալեքսանդր Լուկաշենկոն անվարան հայտարարում է, որ Բելոռուսում երկնագույններ, վարդագույններ և այլ գույներ չեն կարող լինել, քանզի  ժողովուրդը դա չի ընկալի: Եթե նույնասեռ ամուսնությունները մերժում են Բելոռուսը, Ռուսաստանը, Բուլղարիան, Սլովակիան, Լատվիան, Ադրբեջանը, Չեխիան՝ հրաժարվելով վավերացնել Ստամբուլյան կոնվենցիան, ինչու՞ է օրվա իշխանությունը ափալ-թափալ որոշել է գնալ այդ քայլին: Ո՞րն է այս շտապողականության պատճառը: Կա՞ մեկը Հայաստանում, որը  կհավատա Ստամբուլյան կոնվենցիայի վավերացման անհրաժեշտությանը: 

Ստամբուլյան կոնվենցիայի վավերացման անհրաժեշտություն չկա և չի՛ կարող լինել:

Որևէ մեկը կարո՞ղ է հաստատել, թե 2005 թվականին ո՞րն էր Եհովայի վկաներ տոտալիտար աղանդի օրինականացման հրատապությունը Հայաստանում, այն դեպքում, երբ նույն ընթացքում Եվրոպական առաջատար երկրներում /Ֆրանսիա/և մեր տարածաշրջանում /Վրաստան/ այն մերժում էին իրենց իսկ երկրի և ազգային անվտանգությունից, ազգային շահերից ելնելով:

 Պետության հիմքը ամուր ընտանիքն է, այստեղ են մեր արժեքները կենտրոնանում: Պատահական չէ, որ այստեղից են սկսել:

Մենք ոչ մեկի դեմ չենք, մենք պարտավոր ենք մեզ պաշտպանել: Եվրոպական կառույցներն առաջարկում են, նրանք չեն պարտադրում: Իսկ մենք իրավունք չունենք  մեր երկրի և ազգի անվտանգությունը ստորադասել՝  հանուն ինչ-որ անհասկանալի իրավունքների: Ընտրությունը մերն է, մեր կառավարությանը:

Հեղինակ՝ Անահիտ Եսայան

Աղբյուր` Փաստինֆո