Փաստ ինֆո

Եթե գույքի ծագումնաբանությունը պարզող միջոցառումները ենթադրում են քննություն, ապա դա, որպես կանոն, պետք է վերապահվի քննչական մարմիններին, իսկ եթե ստուգողական ու կանխարգելող միջոցառումներ են, ինչպիսիք կարող են լինել հայտարարագրերի ֆինանսական աուդիտը, ապա նման իրավասությունները պատկանում են կոռուպցիայի կանխարգելման հարցերով զբաղվող կառույցներին:

‹‹Փաստինֆո››-ի հետ զրույցում ասաց ‹‹Իրավական ուղի›› ՀԿ-ի համահիմնադիր, բարձրաստիճան պաշտոնատար անձանց էթիկայի հանձնաժողովի նախկին նախագահ Սիրանուշ Սահակյանը՝ անդրադառնալով ‹‹Ապօրինի ծագում ունեցող գույքի բռնագանձման մասին›› օրենքի նախագծին:

Նա նշեց, որ դատախազության դերը քրեական արդարադատությունից դուրս խիստ սահմանափակ է, որովհետև եթե քրեական արդարադատությունից դուրս լայն մասշտաբով դատախազությունը ներգրավվածություն ունենա՝ ինչ-ինչ շահեր պաշտպանելու հարցում, ապա ավելի շատ ճնշող գործիքի կվերածվի, քան շահեր ներկայացնող և պաշտպանող սուբյեկտի:

‹‹Այս տեսակետից մեր Սահմանադրությունը հստակ գծեր ունի և բացառիկ կարգով, պետության շահերից ելնելով, կարելի է քաղաքացիական հայցի շրջանակներում ներգրավել դատախազությանը: Իհարկե, կան երկրներ, որոնք եթե գույքի վերադարձի հետ կապված գործընթացներ են նախաձեռնում, ապա որոշակի դերակատարումներ տալիս են կոռուպցիայի կանխարգելման հարցերով զբաղվող կառույցներին, ուղղակի կախված է ինչ մոդել և ինչ լուծումներով››,-ասաց Սահակյանը՝ նշելով, որ տվյալ նախագիծն ինքն այս պահին ոչ պաշտոնական է համարում, քանի որ պետության կողմից հանրային քննարկման չի դրվել:
‹‹Իմաստալից չեմ համարում նաև դրա շուրջ բովանդակային քննարկումները, կարծում եմ, երբ պետությունն իր պատասխանատվությամբ նախագիծը կշրջանառի և պատասխանատվություն կստանձնի այդ գաղափարների վերաբերյալ, անպայման դիրքորոշումներ կարտահայտվեն:

Խոսելով էթիկայի հանձնաժողովի՝ պաշտոնատար անձանց բանկային հաշիվների աղբյուրները ճշտելու հասանելիություն չունենալու խնդրի մասին՝ նախկին նախագահն ասաց, որ քննչական մարմինները նույնպես անսահմանափակ հասանելիություն չունեն բանկային գաղտնիքին և այն պաշտպանվում է։ Այլ հարց է, թե ինչպես ուսումնասիրության նպատակով ձեռք բերել բանկային գաղտնիքը և կասկածները փարատել։

‹‹Տարբեր մեխանիզմներ կան՝ սկսած, որ բանկային գաղտնիք հանդիսացող տեղեկությունները կարող են փակ ծրարով տրամադրվել որոշակի մարմիններին, հատուկ հիմքերի, որոշումներ և դատական վերանայման պայմաններում դրանք բացել և լրացնել։ Առանձին դեպքերում մուտք գործել դատարան, դատարանի համաձայնությունը ստանալ։ Եղանակները շատ են, ինչևիցե բանկային գաղտնիքը ենթակա է պաշտպանության և անսահմանափակ հասանելիությունը լուրջ սպառնալիքներ կներկայացնի նաև ֆինանսական կայունության տեսանկյունից››,-ասաց Սիրանուշ Սահակյանը:

 Մանրամասները՝ տեսանյութում

Հեղինակ` Սոնա Գեւորգյան