Փաստ ինֆո

ԱԺ ‹‹Բարգավաճ Հայաստան›› խմբակցության պատգամավոր Գևորգ Պետրոսյանը լուրջ չի համարում իշխանության մոտեցումը վեթինգին ու նշում, որ օրենսդիր գործունեության մեջ, օրենսդրական նախաձեռնություններում ‹‹պախկվոցին›› հարգելի զբաղմունք չէ:

‹‹Եթե կա նախագիծ, մանավանդ այնպիսին, որը հենց իշխանության ձեռամբ դարձավ հանրության բացարձակ մեծամասնությանը հետաքրքրող երևույթ, ապա այս մասին խոսել պատերի տակ, առանձին, ‹‹մենք կանենք, հետո կհանձնենք ձեզ››, սա ճիշտ չէ, պետք է ի սկզբանե հանձնել բոլորին և հանրային իրազեկում ապահովել ամենաբարձր մակարդակով››,-ասաց Պետրոսյանը:

Նա նշեց, որ և՛ խորհրդարանական, և՛ արտախորհրդարանական ուժերը նախագծի վերաբերյալ ասելիք են ունենալու, իսկ նրանց  պատրաստի տարբերակը հրամցնելը կնշանակի, որ դա քաղաքական արհամարհանք է քաղաքական գործընկերների նկատմամբ:

‹‹Կարծում եմ՝ նրանք չեն գնա այդ ճանապարհով և հարգելով քաղաքական առողջ համագործակցության սկզբունքն ի սկզբանե այն կհանձնեն նաև մեր դատին, մենք էլ հնարավորություն կունենանք կարծիք հայտնել արդեն իսկ գործող նախագծի վերաբերյալ: Հիմա ինչ էլ ասենք՝ լինելու է ամեն ինչ ոչնչի մասին››,-նշեց ԲՀԿ պատգամավորը:

Նրա կարծիքով վեթինգը պետք է սկսել բարձրաստիճան պաշտոնատար անձանց գլխի պարունակությունը ստուգելուց, հետո անցնել օրենսդիր, գործադիր մարմիններին և ապա դատական իշխանությանը:

‹‹Միայն դատավորների վեթինգով մեր կյանքում այնպես չէ, որ ամեն ինչ կկարգավորվի››,-ասաց Գևորգ Պետրոսյանը:

Աղբյուր` Փաստինֆո