Փաստ ինֆո

‹‹Այսօրվա ակցիայի նպատակն այն էր, որ Կառավարությունը՝ ի դեմս Նիկոլ Փաշինյանի, ականջալուր լինի մեր հորդորներին, խնդրանքներին, չմիջամտի արդարադատության իրականացմանը և չքաղաքականացնի արդարադատության իրականացման պրոցեսները, դրանում քաղաքական բաղադրիչները լինեն բացառված››,-այսօր ‹‹Փաստինֆո››-ի հետ զրույցում ասաց ՀՀ երկրորդ նախագահ Ռոբերտ Քոչարյանի աջակիցների դաշինքի խոսնակ Վահե Եփրիկյանը:

Հիշեցնենք, որ այսօր առավոտյան Կառավարության շենքի դիմաց նրանք ակցիա էին իրականացնում:

Խոսնակը նշեց, որ պաշտոնյաներից ոչ ոք չի փորձել երկխոսության մեջ մտնել իրենց հետ ու ավելացրեց, որ չի հիշում դեպք, որ ներկայիս իշխանության որևէ ներկայացուցիչ փորձի կոնստրուկտիվ երկխոսության մեջ մտնել ու հասկանալ՝ ինչ է կատարվում:

Նա ընդգծեց, որ հանրապետությունում չեն իրականացվում այն պրոցեսները, որոնց մասին վարչապետը մեկ տարի առաջ հայտարարում ու խոստումներ էր տալիս:

Պատասխանելով հարցին՝ ակցիան շարունակակա՞ն է լինելու, Եփրիկյանն ասաց, որ չի կարող ասել, թե ինչ քայլեր են նախատեսվում, սակայն կարծում է, որ այն շարունակական կլինի, քանի որ իրենք վճռական են տրամադրված:

‹‹Մենք ցանկանում ենք ինչ-որ բան փոխել այն ամենի մեջ, ինչ կոչվում է իրավական պրոցես, բայց զուրկ է իրավական էլեմենտներից››,-ասաց Ռ. Քոչարյանի աջակիցների դաշինքի խոսնակը:

Խոսելով մարզերում իրենց համախոհների հետ հանդիպումների շարքի մասին՝ Եփրիկյանն ասաց, որ անկախ նրանից քաղաքացին Երևանում է, թե մարզում, նա հետեւում է տեղի ունեցող պրոցեսներին, հատկապես Ռ. Քոչարյանի վերաբերյալ տեղի ունեցողին ու հետզհետե դուրս  գալիս էյֆորիկ վիճակից:

‹‹Քաղաքացիները փորձում են ավելի ու ավելի սթափ գնահատել իրականությունը, տալ սեփական գնահատականն ու եզրակացությունը: Վերջին շրջանում հասարակական գնահատականն ավելի ու ավելի ռացիոնալ է դառնում, ու մարդիկ կարողանում են սթափ դատել իրականությունը››,-ասաց Քոչարյանի աջակիցների դաշինքի խոսնակը:

Աղբյուր` Փաստինֆո