Փաստ ինֆո

«Սահմանադրության երաշխավորի ինստիտուտը դուրս է մղվել մեր սահմանադրությունից, երբ անցել ենք խորհրդարանական կառավարման ձևին, հիմա նախագահը միայն դրա հսկողությունն է իրականացնում»։ Այսօր նման հայտարարությամբ է հանդես եկել ԵՊՀ սահմանադրական իրավունքի ամբիոնի վարիչ Վարդան Այվազյանը՝ «ՀՀ սահմանադրություն. Կարմիր և կանաչ գծեր» խորհրդաժողովի ժամանակ։

Նշենք, որ խորհրդաժողովը կազմակերպվել է  «Իրավական ուղի» հասարակական կազմակերպության կողմից, որի ընթացքում քննարկվելու է «Սահմանադրության մեկնաբանության գործիքները և սահմանները» և «Դատական իշխանությունը որպես իրավունքի սահմանապահ» թեմաները։ Խորհրդաժողովին, որն այս պահին ընթանում է մասնակցում են ինչպես ազգային, այնպես էլ միջազգային փորձագետներ։

Մասնագետներն  անդրադարձան հայաստանյան իրականում մեջ վերջին ժամանակներս լայն քննարկում ստացած հարցին՝ ՍԴ դատավոր, թե անդամ։ Իրավագիտության դոկտոր, պրոֆեսոր Օթթո Լուխթերնհանդթը հայտարարեց, որ Սահմանադրական դատարանի անդամներ այլևս չկան։ Անդամներն ու դատավորները, ըստ նոր սահմանադրության նույնացվում են և կոչվում են դատավորներ։ Ուստի  Սահմանադրորեն սխալ է խոսել դատավորների ու անդամների տարբերությունների մասին։

«Ես չեմ ուզում խոսել ՍԴ դատավորների ու անդամների մասին, դա նույնն է ինչ հիմա քննարկենք երկրագունդը տափակ է, թե կլոր»,- ասաց արդարադատության նախկին նախարար Դավիթ Հարությունյանը։

Աղբյուր` Փաստինֆո