Փաստ ինֆո

«Վեթթինգը կարող է ունենալ տարաբնույթ դրսեւորումներ, եւ եթե պետական համակարգում նման մոտեցում ենք դրսեւորում,  ապա դա անվերապահորեն պետք է վերաբերի բոլոր պաշտոնյաներին, բայց դատարաններին դա ամենավերջում պետք է վերաբերի, որովհետեւ դատական իշխանությունը եւ դատարանները շատ խոցելի են»,- «Փաստինֆո»-ի հետ զրույցում այսօր այս կարծիքը հայտնեց  ԲԴԽ նախկին անդամ, իրավագիտության դոկտոր, պրոֆեսոր Գեւորգ Դանիելյանը։

Նրա խոսքով՝ եթե ընտրվի որեւէ տարբերակ, որի բաղադրիչը այս կամ այն կերպ քաղաքական տարր կպարունակի եւ նպատակ կհետապնդի դատավորներին դարձնել առավել վերահսկելի, ապա դա ոչ մի պարագայում ընդունելի համարվել չի կարող. «Ես չեմ տեսնում այս փուլում վեթթինգի խիստ անհրաժեշտություն, բայց տեսնում եմ անհրաժեշտություն բարեփոխումների, այդ թվում եւ՝ կազմը բարելավելու, բայց ոչ ցնցումների եղանակով. ցնցումները մեզ լավ տեղ չեն տանելու»։

Մեր այն հարցին, թե այդ դեպքում այդ բարեփոխումները ինչ եղանակով պետք է իրականացվեն, Գեւորգ Դանիելյանը պատասխանեց. «Եթե վեթթինգը չպարունակի քաղաքական բաղադրիչներ, հետապնդումներ, հատուկ չափանիշներով սելեկցիա, ապա դա ընդունելի է, մեծ հաշվով ես դրան դեմ չեմ»։

Գեւորգ Դանիելյանը ցավով նշեց, որ գործող դատավորներ մի մասն այսօր Փաստաբանական դպրոց է հաճախում. «Սա ինձ արդեն անհանգստացնում է. ես կհասկանայի, եթե փաստաբանները գային Արդարադատության ակադեմիա եւ ուսուցում անցնեին, որովհետեւ տրամաբանություն հուշում է, որ փորձառու փաստաբանը իր մասնագիտության ինչ-որ մի փոլում պետք է նաեւ ձգտի դառնալ դատավոր, բայց երբ գործող դատավորը, այն էլ արհեստավարժ, միշտ բարձր վարկանիշ ունեցող դատավորը, ձգտում է դառնալ փաստաբան, դրա արդյունքում մենք կկորցնենք լավ դատավորների, կշահի փաստաբանությունը, բայց հանրային շահի տեսանկյունից դա ողջունելի համարվել չի կարող»։

Անդրադառնալով Արդարադատության նախարարության եւ ԱԺ պետաիրավական հարցերի հանձնաժողովի նախաձեռնությամբ մշակվելիք բարեվարքության նախագծին, Գեւորգ Դանիելյանն ասաց, որ դրա մշակողը իրենք չեն. «Դա իրենց լիազորությունների մեջ չի էլ մտնում, այստեղ արդեն ես տեսնում եմ անհարկի միջամտություն, դա պետք է անի Դատավորների ընդհանուր ժողովը»,-նշեց Գեւորգ Դանիելյանը։

Մանրամասները՝ «Փաստինֆո»-ի տեսանյութում

Հեղինակ` Միլենա Խաչիկյան