Փաստ ինֆո

«Իմ պաշտպանյալ Գագիկ Հեբոյանն իր ցուցմունքներով հայտնել է, որ Բենիկ Հարությունյանի հաղորդման մեջ նշված հանգամանքն իր նկատմամբ սուտ մատնություն է, ինչի պատճառը  2013 թվականին ի վնաս Հարությունյանի կայացված վճիռն է, որով ինքը ֆինանսական բավականին լուրջ կորուստներ է ունեցել»,-«Փաստինֆո»-ի հետ զրույցում այս մասին ասաց կաշառքի գործով մեղադրյալ դատավոր Գագիկ Հեբոյանի պաշտպան Արմեն Նադիրյանը՝ անդրադառնալով գործով վկա Բենիկ Հարությունյանի հաղորդմանը. «Դրա հետեւանքն է ասօր Բենիկ Հարությունյանի թշնամաբար տրամադրված լինելն ու վրեժխնդիր լինելը»։

Հիշեցնենք, որ Բենիկ Հարությունյանը ԱԱԾ ներկայացրած իր հաղորդման մեջ նշել է, որ տարիներ առաջ մեկ այլ գործով 4000 ԱՄՆ դոլար է տրամադրել դատավոր Հեբոյանին՝ իր հայցը բավարարելու համար, ինչը հետագայում չի արվել, եւ գումարը 6-7 ամիս անց վերադարձվել է իրեն։ Նա նշել է նաեւ, որ գործով մեղադրյալ փաստաբան Վահագն Դանիելյանին ինքը հանդիպել է 2017 թվականին, երբ նա այլ քաղաքացիական գործի շրջանակում իրենից գումար է պահանջել՝ Հեբոյանին տալու եւ նրա  վարույթում քննվող հայցը իր օգտին լուծելու համար։

Արմեն Նադիրյանը մեզ հետ զրույցում ասաց՝ քանի որ վկան խոսում է իր մասնակցությամբ ավարտված հանցագործությունների մասին, ապա այդ մասով պետք է պարտադիր քննություն իրականացվի, եւ այդ ամենին պետք է քրեադատավարական գնահատական տրվի։

Նադիրյանը նշեց նաեւ, որ իրենք բողոքարկել են Բենիկ Հարությունյանի նկատմամբ քրեական հետապնդումը դադարեցնելու մասին որոշումը, եւ իրենց բողոքը մերժվել է Գլխավոր դատախազի կողմից. «Եթե դիտարկում ենք, որ կաշառք իրականում ստացվել է, ուրեմն՝ տվողն էլ պետք է պատասխաանտվության ենթարկվի, ուստի մենք համամիտ չենք վարույթն իրականացնող մարմնի հետ եւ Բենիկ Հարությունյանի գործողություններում հանցակազմ տեսնում ենք, թեպետ քրեական հետապնդումը դադարեցվել էր հենց հանցակազմի բացակայության հիմքով»։

Գործով մեղադրյալ փաստաբան Վահագն Դանիելյանի պաշտպան Հենրիկ Մաղաքյանն էլ «Փաստինֆո»-ի հետ զրույցում ասաց, որ Բենիկ Հարությունյանին առաջադրված մեղադրանքը ձեւական բնույթ է կրել. «Մենք ունենք հիմնավոր կասկած, որ դա այլ նպատակ է հետապնդել, եւ մեղադրանք են առաջադրել, որպեսզի նա հեշտ կառավարելի լինի եւ իրենց պահանջած ցուցմունքները կարողանա տալ»։

Նշենք, որ Բենիկ Հարությունյանն այսօր դատարանի դահլիճում հայտարարեց, որ կաշառք հանդիսացող գումարը ԱԱԾ-ի հետ եղել է նախապես մշակված, այսինքն՝ հանցագործության մասին հաղորդում ներկայացնելուց հետո ԱԱԾ-ն է իրեն տրամադրել համապատասխան չափով գումար, ինչն էլ ինքը գցել է Վահագն Դանիելյանի մեքենայի մեջ վերջինիս պահանջով։

Հիշեցնենք, որ Կոտայքի մարզի ընդհանուր իրավասության դատարանի դատավոր Գագիկ Հեբոյանին մեղադրանք էր առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ և 3-րդ կետերով՝ փաստաբանի օժանդակությամբ առանձնապես խոշոր չափերով կաշառք ստանալու համար: Ըստ ԱԱԾ հաղորդագրության՝ կաշառքի գումարը հանցակից փաստաբանի միջոցով փոխանցվել էր դատավորին, որից անմիջապես հետո այն հայտնաբերվել էր վերջինիս մոտ եւ վերցվել: Փաստաբան Վահագն Դանիելյանին մեղադրանք է առաջադրվել ՀՀ ՔՕ-ի 38- 311-րդ հոդվածի 4-րդ մասի 2-րդ և 3-րդ կետերով, այն է` դատավորի կողմից առանձնապես խոշոր չափով կաշառք վերցնելուն օժանդակելը:

Հեղինակ` Միլենա Խաչիկյան