Փաստ ինֆո

Երեւանի ընդհանուր իրավասության դատարանում դատավոր Տաթեւիկ Գրիգորյանի նախագահությամբ շարունակվում է կաշառքի մեջ մեղադրվող դատավոր Գագիկ Հեբոյանի եւ փաստաբան Վահագն Դանիելյանի գործով դատական նիստը։

«Փաստինֆո»-ի հաղորդմամբ՝ քիչ առաջ դատարան ժամանեց գործով վկա Բենիկ Հարությունյանը, ում հաղորդման հիման վրա էլ ամիսներ առաջ Ազգային անվտանգության ծառայությունը բացահայտել էր հիշյալ դեպքը։

Բենիկ Հարությունյանը նշեց, որ երկու ամբաստանյալներին էլ շատ հեռվից է ճանաչում եւ նրանց հետ թշնամություն չունի։

Դատարանի դահլիճում ցուցմունք տալով՝ Հարությունյանը պատմեց, որ մի գործով, որը քննում էր Գագիկ Հեբոյանը, ինքը հասկացել էր, որ իր հայցը պետք է մերժվի, դրա համար նիստի ընդմիջմանը մոտեցել է Հեբոյանին, նշել, որ ինքն ունի թե ֆինանսական, թե առողջական խնդիրներ, եւ հայցի մերժման դեպքում չի կարողանա վճարել 3․5 միլիոն պետտուրքը, ուստի խնդրել է օրենքով սահմանված կարգով իրեն ազատել դրանից։ Վկայի խոսքով՝ Հեբոյանը բացել է օրենքը, ասել, որ միջնորդություն պատրաստի, ներկայացնի, ինչն էլ ինքն արել է։

Ըստ Բենիկ Հարությունյանի՝ Հեբոյանն ասել է, որ ինքը պետք է նաեւ բժշկական փաստաթղթեր ներկայացնի․ «Ես վերցրել եմ իմ հիվանդության մասին փաստաթղթեր եւ ներկայացրել եմ դատարան։ Ասել եմ, որ բերել եմ բոլոր փաստաթղթերը։ Հարցրել եմ՝ Ձեզ տա՞մ թե՞ ներկայացնեմ գրասենյակ, Հեբոյանն էլ ասել է, որ ներկայացնեմ գրասենյակ, իսկ մնացածը հասկանալի է»։

Հարությունյանի խոսքով՝ ինքը չի հասկացել, թե ինչի մասին է խոսքը, եւ Հեբոյանն էլ ասել է՝ գոնե պետտուրքի կեսի չափով իրեն փող պետք է տա․ «Ես ասացի, որ չեմ աշխատում, իմ ողջ գույքի վրա կալանք է դրված 2015 թվականից, ասացի, որ նման հնարավորություն չունեմ, սուտ կլինի՝ խոստանամ ու չանեմ։ Այդպես պայմանավորվեցինք, որ ամսի 18-ին կընթերցի վճիռը, ասաց՝ աշխատիր մինչ դա գումարի հարցը լուծել»։

Հարությունայնը նշեց, որ ինքը չի համաձայնել, քանի որ նման գումարի չի տրապետել, եւ սպասել է մինչ ամսի 18-ը․ «Այդ օրը եկա դատարան,  կարգադրիչներին հարցրի, նրանք նիստից տեղեկություն չունեին, կապվեցին Հեբոյանի հետ, նա իջավ, ասաց՝ վճիռը չեմ հասցրել, երեւի վաղը կհրապարակեմ, ու հարցրեց, թե մեր պայմանավորվածությունն ինչ եղավ, ես էլի ասացի, որ գումար չկա, բայց եւ հասկացա, որ եթե այդ հարցը չլուծեմ, այլ գործերով իմ հայցերը կլուծվեն ի վնաս ինձ։ Ես ուղղակի ի վիճակի չէի 3․5 միլիոն վճարել, ասացի՝ լավ, կգնամ, տեսնեմ, կաշխատեմ մի բան անել»։

Ըստ վկայի՝ հաջորդ օրը նույն ժամին ինքը գնացել է դատարան, վճիռը գրասենյակից վերցրել է, իսկ Հեբոյանին չի տեսել․ «Ամսի 20-ին ես դիմել եմ ԱԱԾ՝ հայտնելով, որ հայտնվել եմ նման անելանելի վիճակում, որից հետ՝  ամսի 25-ին, ինձ հրավիրել են ԱԱԾ, եւ ամսի 26-ին նրանց ուղեկցությամբ եկել եմ Եղվարդի դատարան, բարձրացել եմ երկրորդ հարկ, առաջինում Վահագի գրասենյակն էր, որը փակ էր։ Ես բարձրացա երկրորդ հարկ, ասացի, որ նրան եմ ուզում, նա էլ տեղում չէր, դիմեցի գրասենյակում գտնվող երիտասարդ աղջկան ու միջին տարիքի կնոջը։ Կինը հարցրեց՝ որ զանգի, հարցնի՝ Բենիկն  է եկել, կիմանա՞, ասացի՝ երեւի կիմանա էլի, նման պայմանավորվածություն կա։ Ես ուղղակի ուզում էի իմանալ՝ սպասեմ Վահագին թե չէ»։

Նա զանգեց Վահագին, ով ասեց, որ այդ օրը չի կարող գալ, թող վաղը գամ․ «Դուրս եկա, մի քանի ժամից Հեբոյանը եկավ, ասացի՝ հանդիպեմ իրեն, գուցե միանգամից իրեն տամ։ Կարգադրիչն ինձ ասաց, որ Հեբոյանը տեղում չէ, բայց ես տեսա, որ նա մտել է ներս։ Քիչ անց այդ տղամարդը եկավ, ասաց՝ Հեբոյանն ասում է՝ բարձրացի 2-րդ հարկ, քեզ սպասում են։ Այդ երիտասարդ աղջիկը արդեն չկար, միջին տարիքի կինն էր, հարցրեց՝ ի՞նչ գումար է, ասացի՝ կաշառք է, ասաց՝ գուցե պետուրք է, քաղգործ ունե՞ք, ասացի՝ այո, գործիս համարն ասացի, բացեց, նայեց։ Ասաց՝ չեմ իմանում՝  կաշառք է թե պետտուրք է, ու ենթադրեց, որ պետտուրք է, ասաց՝ ավելի լավ է՝ տամ Վահագի օգնականին,  վաղը տանեն բանկ»։

Վկայի խոսքով՝ երբ հաջորդ օրը եկավ, Վահագն Դանիելյանին պատմեց, թե ինչն ինչոց է, ասաց, որ Հեբոյանը փող է ուզել, ինչն էլ ինքը բերել է, Վահագն Դանիելյանն ասաց, որ գրասնեյակի բակում իր մեքենան է կայանած, թող գնա, բաց պատուհանից գցի ներս․ «Ես հարցրի՝ բա չե՞ք ուզում հաշվել, ասաց՝ չէ, խնդիր չկա, տարա, գցեցի։ Մյուս օրն էլ հանդիպեցի Վահագին, ասաց, որ ամեն ինչ լավ է, ոչ մի խնդիր ինձ հետ չկա»,-նշեց գործով վկա  Բենիկ Հարությունյանը։

Հեղինակ` Միլենա Խաչիկյան