Փաստ ինֆո

‹‹Ինֆորմացիայի ազատության կենտրոնի›› նախագահ Շուշան Դոյդոյանը ֆեյսբուքյան իր էջում գրառում է կատարել և անդրադառձել կառավարության նախաձեռնած՝ ԶԼՄ-ների մասին օրենքում փոփոխություններ և լրացումներ կատարելու փաթեթին, որի նապատակը ԶԼՄ-ների համար Պետական ռեգիստրի տվյալները անվճար դարձնելն է:

Դոյդոյանը գրել է, որ պետությունը չպետք է հասարակությունը վաճառի տեղեկությունը և մեջբերել ‹‹Տեղեկատվության ազատության մասին›› օրենքը: 3 կարեւոր նկատառում պետ ռեգիստրի հայտնի օրինագծի վերաբերյալ.

1. Տեղեկատվությունը պատկանում է հասարակությանը, պետությունը պարզապես դրա պատշաճ պահպանությունն է իրականացնում։ Պետությունը չպետք է վաճառի տեղեկատվությունը հասարակության անդամներին։ Պետռեգիստրից տեղեկատվություն ստանալը վճարովի է, նման հիմնախնդիր առկա է նաեւ Կադաստրի, Արխիվի եւ ՃՈ-ի ոլորտներում, որը ուղղակի հակասության մեջ է Տեղեկատվության ազատության ոլորտի իրավական կարգավորումների հետ։ Վերջինս սահմանում է, որ տեղեկատվությունը էլեկտրոնային եղանակով տրամադրելն անվճար է՝ անկախ ծավալից։ Անվճար է նաեւ մինչեւ 10 էջ տեղեկատվության տրամադրումը, իսկ 11-րդ էջից սկսած կարող է պահանջել վճարել բացառապես տրամադրման տեխնիկական ծախսերը։

2. Որեւէ անհրաժեշտություն չկա հանրության որեւէ խմբի համար արտոնություն սահմանել։ Պետ ռեգիստրում առկա տվյալները գաղտնիք չեն պարունակում, եւ համաձայն Տեղեկատվության ազատության մասին ՀՀ օրենքի՝ պետք է բաց եւ անվճար լինեն հասարակության յուրաքանչյուր անդամի համար։ Իսկ լրատվամիջոցների համար հատուկ արտոնություն սահմանելը է՛լ ավելի է խորացնում օրենքների միջեւ առկա հակասությունը։

3. Ես հասկանում եմ, որ խնդիր կա պահելու պետռեգիստրի համակարգը, բայց մենք արդեն՝ որպես հարկատուներ, դրա համար վճարել ենք մեր հարկերի միջոցով, հետեւաբար պետբյուջեն ամբողջությամբ իր վրա պետք է վերցնի պետռեսգիստրի համակարգի պահպանման ծախսերը։ Մենք չպետք է 2 անգամ վճարենք դրա համար, մեկ՝ որպես հարկատու, երկրորդ` որպես պետտուրք տեղեկատվություն ստանալու համար:

Աղբյուր` Փաստինֆո